Op de vvijse: alsoo’t beghint.
EEn ionghe Maecht
Sprack onuersaecht,
Naer’t vlees wil ick niet leuen:
Want ‘therte iaecht,
En Godt my draecht
Tot eenen staet verheuen,
Mijn Heer’ wil ick aenkleuen,
Dit’s my in’t hert’ gheresen,
Mocht hy ghebeuren my!
Mocht hy ghebeuren my!
Soo waer ick ben vry
Van allen druck ghenesen.
Mocht hy, etc.
Ick word’, als sot,
Begheckt, bespot,
Ghedwaest, ghesloort, ghesletert,
Nou forts’ in’t slot,
Mijn hop’ is Godt,
Die heeft het haest ghebetert:
Aen hem heb ick gheuetert
Hert’ sin, aders, en pesen.
Mocht hy, etc.
My quelt nu meest
‘sWerelts tempeest,
Om dat ick eerst beghinne:
Maer mijnen gheest
Hoopt onbevreest
Op Iesus soete minne,
Gheen lieuer ick en kinne:
Dus segh’ ick noch midts desen,
Mocht hy, etc.
s’Werelts verwijt
Is my iolijt,
Ten kan my niet berueren:
Ick bidd’ altijdt.
Sonder respijt,
Heer’ latet doch langh dueren,
Laetet my hier besueren,
Mach ick eens salich wesen.
Mocht hy, etc.
M. V. B.