Op de vviise: alsoo’t begint.
ADonai ghenadich Heere,
V ghenade is soo groot,
Hoort my toch ick bidd’ v seere,
Van vier dinghen heb’ ick noot:
Gracy, deucht, kost en habijt:
Thoont dat ghy mijn Vader zijt.
Gracy, deucht, etc.
Lieven Broeder Iesu Christe
Schelt my quijt al mijn misdaet,
Dat mijn sotte ionckheyt miste,
Heer’, dat oock vergheten laet:
Doet my namaels gheen verwijt,
Thoont dat ghy mijn Broeder zijt.
Doet my, etc.
Heylich Gheest, o wijs beraeder,
Wijst een onberaden kindt:
O schoon licht komt my toch naerder,
Doet my sien, want ick ben blint:
Leert my kennen svijants strijt,
Thoont dat ghy mijn Meester zijt.
Leert my, etc.
O Maria soete Moeder,
My worp ick in uwen schoot,
Vwen Soon is mijnen Broeder,
Dit is my tot v noot:
Dus Maria t’allen tijdt,
Thoont dat ghy mijn Moeder zijt.
Dus Maria, etc.
Weest ghegroet mijn goet bewaerder,
Heylich Enghel glorieus:
Maeckt my toch den wech wat claerder
Van dit leuen vicieus:
In al t’quaet dat my omrijt,
Thoont dat ghy mijn Leydsman zijt.
In al, etc.
P. B.