’tgaet op de wijse: O Heylich eeuvvich Godt.
ICk mach wel klaghen Heer’ En schreyen langhs te meer, Dat ick v all’ mijn daghen Vergramt heb alsoo seer: In ‘swerelts lof en eer’ Hadd’ ick al mijn behaghen. Vergramt, etc.
Den Mammon triumphant Met weelden abondant, Heeft my (o Heer) bedroghen: Het vleesch aen d’ander kant, De wereldt inconstant, Sy hebben al gheloghen. Het, etc. Door haeren boosen raet, Wierd’ ick seer onstinaet, En in mijn quaet ghepresen: Tot allen ouerdaet, Tot alle sonden quaet Wild ick altijdt een wesen. Tot, etc. Ick heb de werelt wijt Ghedient soo langhen tijdt: Noyt was mijn hert’ te vreden, Maer vol van haet en nijt, Met eenen swaren strijt, Vervult met bitterheden. Maer, etc. Ick wil my keeren af: Want ‘tis al stof en kaf, Om mijn siel te verliesen: Het is al verkensdraf, Vol stancks ghelijck een graf, De deucht die wil ick kiesen. Het is, etc. Ick bid’ v vader mijn, Wilt mijns ghenadich zijn, Door v vijf roode wonden: Weert my het helsch fenijn Weest mijnen Medecijn: Ick ben een vat vol sonden. Weert, etc.
O Vader eeuwich Godt, O Godt van Sabaoth, Wilt my o Heer toch leeren, Want ick ben slecht en bot, Ghy zijt het beste lot, Tot v wil ick my keeren. Want, etc. Ick roep u Vader aen, Als eenen Publicaen. Wilt my o Heer ontfermen: Van ‘tquaet wil ick af-staen, Soo Dauidt heeft ghedaen: Aenhoort mijn bitter kermen. Van, etc. Al zijn mijn sonden groot, En weghen swaer als loot, Wilt my (o Heer) ontladen: Wilt door v bitter doot, My helpen uyt den noot, Want groot zijn v ghenaden. Wilt, etc. Ick bid/, v Iesu soet, Al door v dierbaer bloet, Wilt my v graci’ gheven: Helpt my uyt ‘swerelts boet, Schinckt my dat hemels goet, ‘twelck is het eeuwich leuen. Helpt, etc. Oorlof mijn broeders al, Al komdy tot den val, Keert v tot Godt hier bouen: Want hy v maecken sal Een kint van sijn ghetal, Om hem al-tijts te louen. Want, etc. Peynst om d’ure, L. de G.
Cookies on Poetry Cove