Op de wijse: Also’t beghint.
WEest ghegroet maghet Maria verheven,
Ghebenedijde, bouen alle, vrauwe:
Ghy zijt alleene, die ons brenght het leven
Soete landauwe.
Ghy zijt, etc.
Gratien vele, uyt des hemels throone,
Sijn v gheschoncken, minnelick, en blie:
Der heeren Heere is met v, o schoone
Maghet Marie.
Der heeren, etc.
Hoort, wat een boodtschap, Gabriel ghepresen,
Is vanden hoochsten brenghende, beminde:
Ghy sult ontfanghen, ende moeder wesen
Van eenen kinde.
Ghy sult, etc.
Ghy sult hem gheuen eene name schoone,
Dat sal sijn Iesus, nae des Vaders wensche,
Hy wert des werelts salicheyt idoone,
Godt ende mensche.
Hy wert, etc.
Troost ons Maria: helpt ons Maghet reyne:
Laet desen bode spoedich weder-keeren:
Segh, soo gheschiedet: seght, siet hier die kleyne
Dienstmaecht des Heeren.
Seght, etc.
Wie nu van bouen hemelen bedauwen:
Ende ghy wolcken reghent den verkoren,
Die om de menschen soo van eender Vrauwen
Wilt zijn gheboren.
Die om, etc.
Lof Godt den Vader, lof den Sone mede:
Lof zy v Heylich Gheest in alle tijden:
Lof v Maria, laet ons eens in vrede
Met v verblijden. Amen
Lof v, etc.