Op de vvijse: Aenhoort ghy Maechden reene. VVIlt v met my bekeeren Wereltsche dienaers koen, Tot Godt den Heer der Heeren, Soo ick begheer te doen: Al ben ick ionck en groen, Met veel sonden beladen, Nochtans wil ick my spoen De wereldt te versmaden.
Als ick socht ‘swerelts weelde, En haer ghenoechten kleyn, Ick dansten en ick speelde In ydelheyt onreyn: Ick wandelde ghemeyn Al in haer breede paden, Maer nu wil ick certeyn De wereldt gansch versmaden.
Hooueerdich ick vercierde Mijn lichaem delicaet, Mer all’ onghemanierde Daer was ick vroech en laet: Tot alle sonden quaet Werd’ ick als dan gheraden: Nu will’ ick metter daet De werelt gansch versmaden:
Als ick soo triumpheerde In alle ydelheyt,
De werelt my laudeerde, Mijn eere werdt verbreyt: Aldus werd’ ick verleyt, Door haer soete succaden: Maer nu ben ick bereydt De werelt te versmaden.
Ghedient heb ick mijn daghen De werelt seer onvroet: Dat mach ick wel beklaghen, Beweenen met ootmoet: En penitency goet Doen voor al mijn misdaden, En deur Godts graci’ soet De wereldt gansch versmaden.
Ick will’ my gaen begheuen Tot alle deuchden klaer, Veranderen mijn leuen, Ghestichtich en eerbaer: Heer wilt my helpen daer, Al tot der deuchden graden, Want ick wil nu voorwaer De werelt gansch versmaden.
Den Prins’ ick wil versaken Van deser werelt ront, Want hy moet eeuwich blaken In der hellen af-gront: Met Godt maeck’ ick verbont (Die mijn siel’ kan versaden) Als dat ick nu terstont De werelt sal versmaden.
Cookies on Poetry Cove