op de wijse: O Heylich eeuvvich Godt,
LOf Maria seer reyn,
Schoon suyuer claer fonteyn
Godts Tabernakel schoone:
Wy menschen groot en kleyn
Louen v al ghemeyn
Met sanghen soet van thoone.
Wy menschen, etc.
Schoon als den dagheraet
Met Goddelick cieraet
Is u licht claer in’t blincken:
Want ghy altijts bystaet
Met troost vroech ende laet
Die om v louen dincken.
Want ghy, etc.
Ghy zijn ons leuens vreucht,
Daer Godt in heeft verheucht:
Want bouen alle vrouwen
Sijt ghy vol aller deucht,
Naest Godt ghy veel vermeucht,
Ghy helpt ons uyt benauwen.
Sijt ghy, etc.
Vol van ghenaden zijt
Ghy, oock ghebenedijt,
Maria hoogh verheuen:
Dus seggh’ ick onuermijt,
Den ketteren tot spijt,
Iont ons het eeuwich leuen
Dus, etc.
Princersse Maghet wijs,
Aarons bloeyende rijs,
Lof moet v altijts wesen:
V zy eer’ ende prijs,
Met lofsanghen propijs,
Reyn’ Maghet uytghelesen.
V zy, etc.
Selden tijdt sonder strijdt.