Dyt is die wyse dat voghelken inden haeghen dat synghet vander wilder auentuer
wanneer die wynter comt int lant begint myn lief te truren
1Die vogelkens van deser oerden
die syngen ghenoegelic
al inder sueter meyen tyt
soe syngen sy suetelic
sy lauen hoeren schepper
tys ons een scoen fyguer
laet ons van sonden wachten
die tyt die valt ons duer
2Myn herte ende alle myn synne
wacht v van swaer verdriet
ende wilt heer Jhesus mynnen
hi is alsoe trouwen vrent
en wilt hem niet begeuen
noch in geenre noet afgaen
in uwen meesten liden
sal hi v vast bystaen
3Hoe licht myn arme ziele
geuangen in dit verdriet
of sy by Jhesus coemen mach
des en weet ic waerlic niet
myn gedachten syn soe mennichvolt
sy verstueren mynen syn
ic en kan des niet gebeteren
eer ic by heer Jhesus byn
4Ick wyl my gaen verheffen
ende verhoegen mynen moet
heer Jhesus wil ic dienen
ende liden weder spoet
hi is soe gueder tieren
hi sal my wal ontfaen
als hi dede magdalena
sy hadde soe voel mysdaen
5Maria Conyngynne
myn troest myn toeuerlaet
aen v byn ickes gebleuen
daer al myn troest aen staet
wilt my genade verweruen
aen Jhesus uwen soen
dat wi bi hem moeten coemen
al in des hemels troen
6Nv biddet alle gemeyne
Jhesus van nasaret
dat hi hoer herte verlichten wil
die dit lietken heeft gedicht
dat wi by hem moeten coemen
al in dat suete jolyt
ende ewelicke lauen
den conynck van hemelryke
Amen