dit is die wyse Ic hoerden op eenre mergen stont dat scheyden seer beclagen 1Ic hoerden op eenre mergen stont dat liden seer beclagen dat liden heeft myn hert doer wont gebracht in groter varen
2O liden gy syt alsoe guet mer hatelic den menschen mer wye bekent uwen edellen aert die plech nae di te wonschen
3Nv wil ic keren mynen syn ende setten my toe stryden Och waer ic coem of waer ic byn auer al soe vyndic lyden
4Nv lyde wy nv lide wy och dat moet ommer wesen die Jhesus in synen herten draget sal lidens wal genesen
5Lyden is een edel staet diet wal gelic kan dragen sy wanderen inder mynnen pat die lyden sonder clagen
6Lyden is een bitter woert des werde ic wal ontware lyden heeft myn hert gescoert gebracht in groten trueren
7Nochtants en wil ic in mynen moet dat liden niet versmaeden liden doncket my wesen guet ic byns aldus beraeden
8Dat ic dat liden niet en kan dat moet ic nv besueren liden heeft myn hert gestuert gebracht in groten trueren
9Als ic dan meenden seker te syn soe warde ic jerst bedragen liden is een medesyn ic byn daer mede ontvlagen
10Och lyden wie geuet di die macht dattu bestryckest dye banden gy stuert daer mennich inden rechten pat mit eren of mit scanden
11O liden wat heuestu gedaen du beroeueste myne synne gy cost my alsoe mennygen traen gy quelt myn herte van bynnen
12Wat vrouden mach my nv geuen moet als ic gedencke der quaelen dat liden maket mennygen vroet die in genoechten dwaelen
13Dat lyden sterket den crancken moet het temmet die wylde synnen het maket mennygen van bynnen vroet het leert hem god te mynnen
14Och liden gy syt alsoe guet gy leert die tragen stryden ende gy bedwynget den jongen moet den gy beswaert mit lyden
15Eer ic mit liden waert beuaen soe dwaelde ic wtten paede liden heeft my doen verstaen dat ic nv leue by rade De stok van de 'r' lijkt hier langer dan gewoonlijk.
16Had ickes my wal te tyde bedacht ende my te rechte versonnen ic hadde den stryt ten eynde ghebracht den ic jerst hebbe begonnen
17God geue den liders gueden moet ende van stryden sege dat hi doer druck ende wederspoet moet comen ten g ewigen leuen
18Soe mach hi ewige vroude ontfaen ende loen van synen stryde van liden dat hem heeft beuaen ende benauwet aen allen syden
19Die ons dit liedekyn heeft gedicht god sterken in synre mynnen dat hem syn liden werde verlicht dat hem beswaert van bynnen Amen
Cookies on Poetry Cove