dit is die wyse O Jhesus dulcis memoria 1O Jhesus suete andachticheit waerachtige vroude ende salicheit mer bauen alle ghenoechgelicheit is suet din tegenwoerdicheit
2Ten waert gesongen nye sueter sanck noch blyder en waert nye herte becant noch weerder vrucht en quam nye voert dan des soene gades gebuerte
3O Jhesus der sundaren toeuerlaet die hi soe vaderlic ontfaet hoe wal is hem die daer nae staet dat hi hem sueke sonder aflaet
4Geen tonge en kans gespreken niet geen penne en kans gescryuen niet Mer dies gesmaket hoe wal weet hyt wat Jhesus christus te mynnen is
5Jhesus te mynnen is ewich guet dat myne ziele in qualen verlangen doet nae synre sueter honichuloet daer sy in vyndet hoers hertsen boet
6Och Jhesus geuet te voelen my die auersuetherticheit van dy dat ic bekenne wat vroude het sy die tegenwoerdicheit van di
7Och suete Jhesus die mynne din die is soe suet ende alsoe fyn sy versadet sonder pyn ende altoes doet sy hongerich syn
8In honger leuet hi die dyns gesmaket altoes syn hoechste begeerte waket onachsom allent dat hem genaeket dat niet en is wt di gesaket
9Comet Jhesus lief der zielen myn verleent my doer die doegden dyn dat ic moet sien dyn claer aenschyn ende ic des moege vroelic syn
10Dat suetste alre sueticheit is Jhesum te mynnen voerwaer gesecht het is bauen alle begeerlicheit een auersuete bequamelicheit
11O auersuetste guedertierenheit Jhesus mynne ende vrolicheit ghyf dat my trecke dyn sueticheit tot dinre mynnen ewicheit
12Myn hoechste lof is Jhesum te mynnen ende nvmmermeer vremden troest te wynnen want beter waert te mael te ontsynnen dan bauen Jhesum yet te mynnen
13O Jhesus alresuetste myn verleent der zielen troestelicken schyn die suchtet ende claget ende lidet pyn om altoes lief bi lief te syn
14Hi is der zielen vrolicheit myns herten hoechste weerdicheit ende alder werlde salicheit ende alder werlde vroelicheit
15Waer ic in alder werlt sy Jhesus is mynre herten by als ic hem sueke hoe bereyt is hi als ic hem vynde hoe wal is my
16Den ic sueke sie ic te hant myns leuens heb ic een seker pant des my quellen doet der mynnen bant die myn herte heeft al verbrant Amen
Cookies on Poetry Cove