dit is die wyse Ick weet een vrouken wal berey
1Ic weet heer Jhs wal bereyt
hi heeft myn herte omvaen
mit synre sueter mynlicheit
ic en kan hem niet ontgaen
ic moet syne guetheit dragen
syn wesen dat is soe wal gedaen
hi staet in mynen behagen
2Schoenre here en sach ick nye
des wil ic my vermeten
tys recht dat ic hem vrenscap doe
hi doet myn druck vergeten
hoe reyne is alle syne mynne
my is te bet dat ic hem sie
dat doet syne suete mynne
3Desen here en wil ic niet begeuen
hi staet soe vast in my
bauen alle die daer leuen
tys recht daer is reden by
syne mynne is alsoe breyt
als ic in synen synnen stae
soe vergete ic alle myn leyt
4Syn wesen is claer syn glorie is schoen
dat licht als een crysstal
mocht ic hem spreken sonder vaen
dat waer myn wonschen wal
Och lacy neen ic niet
dat doet myn vleysch ende alle myn sunden
sy holden my int verdriet
5Desen heer en is nyemant toe hoge gebaren
des wil ic my verblyden
ic heb hem in myn herte vercaeren
dat doet syne suete myn
Och lacy ic lyde pyn
dus moet ic vast in j hapen leuen
ic byn in druck alleyn
6Jhesus here siet aen myn druck
doer alle myne begeren
al is dyt liden in my gedicht
ic bid heer Jhesus seer
gy syts my wal weert
och v te dienen alle myn leuen
waer gys here op my begeert
Amen