Stem: Van mijn heer van Valckensteyn. VVie wil hooren een Nieu Liet Hoort toe ick sal ’t jou singhen, Van drie Ghesellen uyt Roosendael, Op Vrybuyt wast dat zy ginghen. Zy gingen byloo by nachte niet, Maer zy ginghen op avonture, Soo langhe tot dat zy gheldeloos ware Dat duerden een kort hallifure. Als zy ter halver weghen quamen Een Koopman quam haer teghen: Legh of, legh of jou Koopmans goedt Wilt ghyder behouden u leven. Ick legh niet of mijn Koopmans goet En daer toe mijn jonghe Leven, Ick hebber noch Silver en rooder gout En dat sal icker jou gheven. Die Koopman zijnen Tas ontsloot En hy schoncker wel honder Kroone
Hout daer Ghesellen van Roosendael Verteertse met Vroutjes schoone. Doe sprack die jongste al van die drie, Die Buyt willen wy gaen klijven, En geven die Koopman zijn halve goedt weer So mach hy een koopman blijven. Doe sprack die outste al van die drie Die Buyt willen wy gaen houwen, En koopen ons elck een Appelgrau Ros En rijden t’Antwerpen binnen. Als zy t’Antwerpen binnen quamen t’Antwerpen binnen der mueren, Sy wierden op een Pijnbanck geleyt, Dat deder haer jonck hart treuren. Nu zijnder al ons leden lam, Wat sullen wy gaen beginnen? Ick wilder niet meer nae Rosendal gaen En hooren die Nachtegael singhen. O Nachtegael, kleyn Voghelkijn Hoe heb jy mijn bedroghen, Gy plach te singen onder een Peereboom Daer veel schoone Vroutjens waren. O Nachtegael, kleyn Voghelijn Wil jy mijn leeren singhen? Ick singher int wout kleyn Voghel stout Niemandt kander my dwinghen. Ben jy int wout kleyn Voghel stout Kan jou niemandt bedwingen: So dwingt jou den hagel die koude sneeu, Het Looff al van der Linde.
Cookies on Poetry Cove