Op de wijse: Een Seraphijnsche tonghe. Hoort toe wat ick u leere, Kinders van goeden aert: Dient voor al God den Heere, Met geen fond u beswaert: Ghy sijt toch al herboren In Christo Iesu fijn: Gaet ghy nu weer verloren Ten sal maer u schult sijn.Ghy sijt, &c. Maer wilt ghy wel u leven Aenstellen naer behoor, Hoort niet nae t’quaet ingeven Al vanden helschen Moor: Oock vande quade leckers Die vuyl manierich sijn, Wacht u, t’sijn cleyne neckers, Sy stroyen quaet fenijn.Oock, &c. Maer noch wil ick u bringen Al voorder tot de deucht: En wilt my niet ontspringen, Komt mee ghy jonghe Ieucht, Komt hoort catechiseren, En komter met jolijt, En wilt toch niet faeljeren, T’is toch al u profijt.Komt, &c. Der sult ghy wonder leeren, En veel dingen onclaer Sullen door lichts vermeeren V worden openbaer:
Oock sult ghy hooren spreken Seer fraey en excellent, Sy staen al op haer reken, Met oorden pertinent.Oock, &c. Noch sult ghy hooren singhen Een liet met soeten toon, Van geestelijcke dingen, Tot deuchden seer ydoon: Leert dese oock van buyten, En laet de vuyle staen, Laet die vuyle schavuyten Die nae de Helle gaen.Leert, &c. Maer als ghy nu te gader Den Catechismus hoort, Ick ben u een goet rader, Den Pater niet en stoort: Want anders sout ghy derven Alle die prijsen schoon, Die de stille verwerven En krijghen voor haer loon.Want, &c. Dus handekens te samen, En wilt de oogen slaen Op Pater nae betamen, En hoort sijn goet vermaen: Dus doende suldy wassen In Godts graey divyn, En groote wijsheyt tassen, Op seer corten termijn.Dus, &c.
Cookies on Poetry Cove