Op de wijse: Van Sint Michiel in het Wirtsburchs ghesangboeck.
Lof Iesu die tot ons profijt,
Op desen tijt,
Ghedaelt zijt uyt ws vaders schoot,
Om te verdragen
Nae weynich dagen
Die bitter doot.
Laet ons met eenen blijden moet
Nu eens beginnen,
V te beminnen
O Iesu goet.
Ghy cmt ter werelt naeckt en bloot
In groter noot,
En achterlaet s’hemels laysier,
Om door u lijden,
Ons te bevrijden,
Vant helsche vier.Laet ons met, &c.
Aensiet o mensche hoe dit kint
Hem selven pijnt,
En maeckt hem cleyn in menschen schijn,
Om haer te trecken,
En te verwecken,
Om cleyn te sijn.Laet ons met, &c.
Wie heeft sulck wonder oyt ghehoort
Vleys wert het woort,
En onsen vader op dat pas
Wordt onsen broeder,
Een maegt sijn moeder,
Wiens kint sy was.Laet ons met, &c.
Int kribbeken wort hy gheleyt,
Wiens Majesteyt,
Die koningen te boven gaet,
Hy wert ghewonden,
Die heeft ontbonden,
Al ons misdaet.Laet ons met, &c.
Met woorden tonen sijn verdriet
En kan hy niet,
Maer sijn cleyn oogskens sijn vervult,
Met vele tranen,
Om te vermanen,
Der menschen schult.Laet ons met, &c.
Iesu die tot ons nu ter tijt
Ghecomen sijt,
Wy bidden u geeft ons den loon,
Dat nae dit lijden
Wy ons verblijden,
In uwen throon.Laet ons met, &c.