Op de wijse: Het viel een hemels, &c. Maria. Ewich God almachtich, Tot u so roepen wy, Wilt ons eens sijn gedachtich Maeckt Israel eens bly: Wilt haest Messias senden, Die ons verlossen sal Van alle ons elenden Geschiet door Adams val.Wilt haest, &c. Och mocht ick eens aenschouwen Die schone jonghe maecht, Die edel vrou der vrouwen, Die Godt so heeft behaecht, Dat sy eens sal ontfangen Den Salich-maker soet, Naer hem staet mijn verlangen, Hy is dat eewich goet.Dat sy, &c. Ick wensch met hertzen seere Dat ick haer dienen mocht Die tot so grooter eere Van Godt al sijn besocht: Want sy is uyt gelesen Van inder eewicheyt, Om eens moeder te wesen Van sijnder Majesteyt.
Den Engel. Ick groet u Maget schoone, Gebenedijt sijt ghy, Den Vader uyt den throone Die is u altijdt by: Hy heeft u uytverkoren, Want ghy vol grati sijt, Van u sal sijn geboren Christus gebenedijt.Hy heeft, &c. Maria. Wat sijn dit voor nieu-maren, Seght my t’verstant hier van, Hoe ist dat ick sou baeren, Daer ick noyt kende man: Ick heb Godt opgedragen Van jonx mijn suyverheyt, Om hem soo te behaeghen Tot mijnder salicheydt.Ick heb, &c. Den Engel. Schoon maecht wilt u verblijen, En sijt toch niet bevreest, Die Heer sal u bevrijen, V senden sijnen geest: Sijn kracht sal u omschijnen, Van hem sult sijn vervult, En baeren sonder pijnen, Moeder Godts wesen sult.Sijn, &c. Maria. Mijn hert is seer ontsteken, Als ick u heb gehoort, Met blijschap wil ick spreken, My geschie naer u woort: Mijn siel maeckt gtroot den Heere, Ick wil hem roepen aen,
Want hy sijn dienst-maecht teere Veel grati heeft gedaen.Mijn, &c. Den Dichter. Ter eeren laet ons singen Van die schoon Maget reyn, Op dat sy ons wilt brengen In dat schoon hemels pleyn: Daer vreucht is boven maten Voor die tot Godt hem keert, Gheen herte en kanse vaten, So die Schriftuer leert.Daer vreucht, &c.
Cookies on Poetry Cove