Nieu Cluchtich Liedeken. Op de wijse: Venus noyt gheboren.
EEns was ick ghebeden Op een seker Feest Daer ick ghinck met reden, Om t gheselschap meest Met minnelijckheden Hiet den Bruydegom Ieghelijck Seer uyter maten willecom Arm en rijck En leyde ons so aen den brom.
Die Scharmeyen cloncken Daer met groot ghetal Wy werden beschoncken Soo met vreuchden al Sonder langh te proncken Wert de spijs ontgost Vry en vranck Niemandt en spaerden den cost En den dranck Gooten wy in als soeten most.
Wt vreucht en ghenuchten Moest elck eens expres, Drincken sonder suchten, Op het goet succes, Van allen de vruchten Die de soete Bruyt Krijghen sou Maer eer daer yder eens had uyt Een Vroe-vrou Was daer van doen door groot gheluyt.
Want de Bruyt inwendich Kreegh den Arrebeyt En ginck seer ellendich Wt de vrolijckheyt Dat sy langh behendich Had bedeckt met pijn Wou subijt Daer op sijn moeders feeste sijn Doen ter tijt Al by den Rensen coelen wijn.
Om ’t gheschimp te staken Sprack den Bruygom fraey Let niet op dees saken Want een Bonte Kraey En can ons niet maken
Grooten winter cout Soomen seydt Maer zijt toch, vrolijck ionck en out T’is bereyt Om u te helpen sonder fout.
Dus ginck elck hem spoeyen Aen tweede gherecht Sonder hem te Moeyen Met den handel slecht. T’was wel te bevroeyen Wie den Vader was Van dit wicht T’gheen dat de Bruyt daer op dat pas, Braght int licht. En ons daer na vertoonden ras.
PRINCE Prince seer lofweerdich Quam daer veel bancket Een Pastey korst-veerdich Wiert daer by gheset Daer het Kint expeerdich Vande Bruydt in lach Dat ick daer Met allen het gheselschap sach Ende daer naer Scheyden ick metten claren dach.
Ongheleertheyt faelt licht.
Cookies on Poetry Cove