Een Nieuw Amoureus Liedeken.
Op de wijse: Comt aen schoon velt-Goddinne oft Daelt nu musa goedertieren.
HOe is, mijn teer hert van binnen
Fortsich soo door wondt?
Ick mis, schier eylas mijn sinnen
Haest u Nimph terstont
Ghy cont my ghehelpen wel
Die om u te minnen
Lijde dit swaer ghequel.
Seer fel, voel ick mijn hert brandigh
Dorsten lief na ou,
Wilt snel, my toch sijn bystandigh
Eer ick sterf van rou
Siet nou, wat ick smerten ly
Om dat ghy Tyrannigh
V thoont teghen my.
Sult ghy my dus doen versmachten
In mijn pijn, o schoon,
Wildy dan niet eens betrachten,
Mijn verdiende loon
O croon o mijn Perel eel
Doet sijn druck versachten,
Die dus lijdt soo veel.
Juweele aerdigh dat can wesen
Hier op aerdtrijck
Tanneel weerdich uytghelesen,
Wie is uws ghelijck,
‘k Beswijck al mijn cracht begheeft
Ick ben als een verwesen
Die gheen macht en heeft.
PRINCE.
Beleeft sal ick u steets blijven,
Mijn weerde Matres
Die leeft op hope van beclijven
Soo ghy siet expres
Princes steunsel van mijn hert
Doet van my verdrijven
Dees mijn groote smert.
Alleen deur een, Iaecques Clouwens.