Een nieuw vreught Liedt. Op de wijse: Eenen Satyr wel ghemoet. LVstigh, die hier zijt by een En met vreughden hier vergaren Laet nu alle droefheyt van u scheen En al u beswaren, varen Want wat isser meer als vreucht Die het herte maeckt verheught. Vreught wort aldermeest begeert Vreught die droefheydt doen ghenesen Die met vreught den tijdt passeert, Moet met recht ghepresen, wesen Daermen eenen Tayen bloet Die dit hart, versmayen moet. Daerom lustigh, schaft en bromt Vry, al sonder achter dencken Want het niet altijt en comt, Dus laet ons drincken, schincken
Dapper gaept, en giet Want het Bacchus soo ghebiet. Oft hebt ghy van doen Toeback Seght vrolijck, sonder stooren Latet commanderen strack En wilt naer ’t behooren, smooren Set de pijp aen uwen mont Datmen siet wat dat ghy cont. En ontsiet niet wat, cost Oft en wilt soo haest niet deysen Eyndet soo ghy hebt begost En laet swaer ghepeysen, reysen Spoelt dan Toeback door de keel Met een halfken, oft een heel. Siet dat ghyet ydel maeckt Al sout ghy Zilenus slachten Want een ander daer naer haeckt Die dat met aendachten, wachten Brenghet die meest siet op ou Want hy is van dorst schier flou. Prince. Fraey nu als een Prins maeckt leegh, Ghy siet oft ghy waert verwaten Dat ickt in mijn handen kreegh, Ick sou een ander laten, praten En maer dencken, hoe ick dat Mocht om-keeren sonder nat.
Alleen deur een.
Cookies on Poetry Cove