op de wijse: Te Mey als alle de Voghelen singhen. Nu heffen wy een Nieu Liedt aen Vanden Antichrist wilt dit verstaen,
Het sal hem nu openbaeren Den rechten gheest zijns monts verstaen, Dat sal ick v verclaeren.
Een oprecht Guyt is zijnen Naem Die altijt teghen de waerheydt wil staen Met woorden en met wercken Dat heeft den Paus so langhe gedaen Alsomen nu mach mercken.
Christus ginck prediken alle daghen Hy en reet op Rossen noch op Waghen De Paus heeft so heylighe voeten De Aerde is hem niet weerdich te draghen, Alle Keysers zijn voeten kussen moeten.
Christus die leefde in groot verdriet Also veel eygens en hadde hy niet Daer zijn hooft op rusten mochte Sint Peter hy seluest visschen hiet Doe hy den Cijnspenninck brochte.
Hier teghen nu is den Paus so rijck Men vint ter werelt niet zijns ghelijck Van Steden ende van sloten Dat heeft hy vercreghen al met practijck Dat heeft Godt nu eens verdroten.
Siet aen Christum Gods leuende Soon Hy heeft ghedraghen een doornen Croon Men mocht niet by hem geraken Want hy den Berch is op ghevloon Doe men hem Coninck wilde maken.
Hem seluen heeft de Paus gestelt
Bouen alle Coninghen met ghewelt Hy draecht drie Croonen van Gouden Veel Christen bloets stort hy int velt Dat moetmen voor heylicheyt houden.
Sijn Leere gelt meer dan Gods ghebot Met Christus woort hout hy zijnen spot Sijn doen en is niet dan lieghen Sijn Jongeren gaen geschoren als een sot, Om de Armen te bedrieghen.
Christus heeft den doodt ghesmaect Hier wt heeft de Paus een Craem gemaect, End Aflaet Brieuen gheschreuen Op dat daer niemant aen en gheraeckt, Hy en moeter veel ghelts om gheuen.
Vande Misse maect hy een Offerhant Hy seyt datter onse salicheydt aen hangt Js dat niet seer gheloghen Diemen doch alle door Christum ontfangt Dus heeft hy ons bedroghen.
Ja Christus ware noch vermaledijt Hadden hem de Missen niet beurijt Want als sy haer Canon lesen So bidden sy den Vader altijt Sijnen Soon ghenadich te wesen.
Christum heeft hy oock vast geleyt Jn ijseren sloten, somen seyt Alsmen hem gelt geeft met hoopen Soo moet Christus dan zijn bereyt Om de sielen te laten loopen.
Hy heeft gemaeckt dat Vagevuer Daerinne set hy de Zielen puer Alsmen hem ghelt wil toegheuen Dus heeft hy de heele werelt schier Met valscheyt in ghecreghen.
Hy seyt, God heeft ghemaect door biecht Daer hy doch valschelick aen liecht Hy heeftse seluest gheuonden Daer hy den menschen door bedriecht, Om gheldt vergheeft hy hare sonden.
Hemseluen heeft hy daer toe verknocht En menige Vrou ter schande gebrocht Als sy claghen hare ghebreken Och Vrouken ick heb my so bedocht Jck moet v alleen wat spreken.
Dese sonden acht den Paus so slecht Daerom ghebiet hy zijn gheschoren dreck Dit is den mensche der sonden Daer Sinte Paulus af heeft gesecht Dat wort nu al beuonden.
Dit is de rechte Antekerst Die t'bloed en sweet den armen wtperst Met bannen ende met iaghen Nu is hy geuallen dat hy berst Godt en wilt niet langher verdraghen.
Jck bidde v Vader ghebenedijt, Dat ghy hem doch ghenadich zijt Ende wilt hem gracie geuen Op dat hy zijn sonden doch eens belijt End eewich met v mach leuen.
Cookies on Poetry Cove