op de wijse, Jonck dom herteken wat cont ghy maken, etc. Vvilt met Processie nu al te samen Vwen nieuwen Gouuerneur vermaert,
Groot Commandeur van Castilien met namen Jnhalen met zijnen hoop vergaert.
Jn Antwerpen is hy gecomen druypen Als een Haen die vanden regen is nat, Die Burghers ginghen te samen sluypen Vraghende wat mocht beduyden dat?
Den lesten Januarij voorleden, Js die tijding ghecomen int openbaer, Tot Antwerpen al binnen der steden, Hoe dat die slach met haer verloren waer.
Te Loddijcks hoeck by Bergen sy lagen Aen haren Anckeren die Papouwen snel Die Geuskens quamen haer veriaghen, Aenboort sy haer clampten wel
Tgrof gheschut aen allen zijden Ginck daer af als een donderslach, De Roers die knapten te dien tijden, Twelck velen was een hardt gelach.
Don Juliano den Tyran moedich, Men op der Papisten Admirael vant, Sy namen hem by den halse spoedich, En meenden het was den selfden Tyrant
Den eenen stack hem door die kele, Seggende dat is voor v Moordery fel, Die ghy tot Naerden ende Haerlem vele, Hebt ghedaen met moede fel.
Hy riewp Ghenade, ick ben een Graue, Neemt my geuangen om mijn edel geboort Maer menighen steke sy hem gauen, En smeten hem daerna buyten boort.
Die Schepen onder den anderen dreuen, Die Geuskens leyden al aen boort: Papouken te vluchten men sach aenheuen, Tot onder Berghen seer verstoort.
Jn grooter noot sy lieten steken Thien van haer beste Schepen vaeliant Alsoot daer claerlick is ghebleken, Catte noch Hont quammer van te Lant.
Spaeniaerts, Walen, Jtalianen mede, Menigen roep men hoorde daer: Mesericordia roepen, dat was haer zede, Maer gheen genade en was aldaer.
By de twee duysent zijnder ghebleuen, Van die Papouwen, en dat is waer: En op de schepen die na Berghen dreuen Wasser seer vele ghewont aldaer.
De Gouuerneur van Vlissingen moedich Monseur Boisot geheeten is, zijn broeder was Amirael hoochmoedich die volbracht heeft dit Feyt ghewis.
Papisten wilt doch eens ouerdencken, Dat Godt de Heer bouen v regeert: daer hy mede is, mach niemant crencken Twelck die schriftuer ons oock wel leert.
Al binnen Vlissinghen soet wtuercoren, daer worden op een tijt binnen ghebracht, Vier Schepen van de Papisten verloren, Welc waren de principaelste van macht.
Die ander vijue die sachmen blijuen
Ter Vere binnen met groot geluyt Twas al verblijt, Mannen ende Wijuen, Al van de groote schoone buyt.
Met negentien Schepen sy volbrachten Desen Tocht teghen den vyant verwoet, Welcke Victorie groot is te achten Die ons gegeuen heeft de Heer seer soet.
Laet ons den Heere dancken en louen Voor zijn groote genaden niet cleyn, En groot maken onsen Godt hier bouen, Met Lofsanghen ende Psalmen reyn.
Cookies on Poetry Cove