Op de wijse, Rijck God hoe is mijn Boelken dus wildt, etc. Helpt nu v self, so helpt v Godt, Wt der Tyrannen bant en slot, Benaude Nederlanden, Ghy draecht den Bast al om v strot, Rept flucx v vrome handen.
De Spaensche hoomoet valsch en boos, Sandt v een Beudel Goddeloos, Om v Godloos te maken, Gods woort rooft hy door menschen gloos, En wil v tghelt ontschaken.
So neemt hy elck sijn hoochste goet, Die t Woort der sielen voetsel soet, Om draf niet willen deruen: Becoopent met haer roode bloet, Of moeten naeckt gaen sweruen.
Maer die zijn hert op Mammon stelt, Moet oock ontberen tlieue ghelt, Sijn Godt, zijns vleeschs betrouwen: Hy eyscht den Thienden met gewelt Diet gheeft, sal niet behouwen.
Want gheeftmen dick van thienen een, Daer blijft ten lesten een noch gheen, Woll mach den Herder stillen, Dees Wolf is met Woll noch Melck te vreen,
Hy wilde schaepkens villen.
Sijn buyck is onuersadelick, Bloet en gheltdorstich stadelick, Als die met wreeden moede Tlants ghelt verquist verradelick Aen Conincklicken bloede.
Verdient dan sulck v Huerlinck fel, Den Thienden Penninck niet seer wel, Omt Nederlant te schenden? Gheeft ghy hem die, soo maect ghy snel Den bant om v te binden.
O Nederlant ghy zijt belaen, Doot ende leuen voor v staen, Dient den Tyran van Spaengien, Of volcht (om hem te wederstaen) Den Prince van Oraengien.
Helpt dees Herder die voor v strijt Of helpt den Wolf die v verbijt, Weest niet meer Neutralisten: Vernielt den Tyran, Tis nu den tijt, Met al sijn Tyrannisten.
Cookies on Poetry Cove