Op de wyse vanden slach van Dueren. Een Liet sal ick v singhen, Hoort toe Man ende Vrou, Ter Zee meynt ons te dwingen De Graue al van Bossu, Duckdalue was hy seer ghetrou, Sijn Admirael, dat seg ick v, Dit was nu zijn Officy, Sijn schip hiet Jnquisicy.
Op de Zee is hy gecomen Met alle zijne macht, De Geusen al sonder schromen Die hebben daer op geacht:
Ons Edele Admirael wijs bedacht, Die heeft al na Bossu ghewacht, Om teghen hem te campen, Hem lustich aenboort te clampen.
Als de Papisten vernamen Dat de Geusen haer waren ontrent Oft als sy by haer quamen So hebben zijt af gewent, Sy waren beureest voor dit elendt Maer Schuylenburch tzy v bekent Die en mocht dat niet ontdrijuen, Gheuanghen most hy daer blijuen.
Jn October den elfsten dage Hoort wel na dit bescheyt, De Geusen die daer laghen Tot enteren wel bereyt, Maer de Papisten, voorwaer gheseyt Sy hebbent lieuer afgeleyt, Want sy haer meest verlieten Al op haer stercke schieten.
Die leste aen malcanderen togen Die Geusen smeten van bouen neer de Potten met Calck die vlogen Wten Mersse, hoe langer hoe seer Jnt Spaeniaerts oogen was dat een sweer Die Calck die stoof hoe langer hoe meer, Haer Schepen men wit sach weerden, Met die Calck men haer verweerden.
Die Papisten hoort mijn gewagen, Lieten Bossu al int verdriet,
Maer de Geusen al sonder vertsaghen Besweken malcander niet, Alsoot daer claerlijck is geschiet, Twee vrome Capeteynen, hooret bediet, Onsen Admirael by stonden, En dreuen met hem aen de gronden.
Men ginck daer met geschut in klincken Om de Spaeniaerts te maken tam Capeteyn Vesten schip deden sy sincken Eer tspel ten eynde quam: De ander seylden na Amsterdam, Hierom was Bossu so gram, Dat sy hem lieten verloren Die hem trouwe hadden ghesworen.
Sy worden daer bestreden, Beuochten aen elcken cant, Bossu heeft genade ghebeden Onsen Admirael triumphant: Zijn Signet streeck hy van zijn hant, Zijn gulden Vlies, vaet dit verstant, Dat heeft hy ouerghegeuen, Om te behouden zijn lijf ende leuen.
Men sach daer domineren De Geusen met blijden geluyt, Voor Hoorn triumpheren Al met so schoonen Buyt, Van metalen geschut, end oock van cruyt Amsterdam coemt morgen weder wt, Te Hoorn binnen de Palen, Om v Inquisicy te halen.
Cookies on Poetry Cove