Op de wijse: Jck roep v O Hemelsche vader aen. Vvie wil hooren een goet nieu Liet, Hoort toe ick sal v singhen, Al wat voor Alckmaer is geschiet, Hoort toe na mijn bediet, Jck sal v liegen niet, Het zijn also vreemde dinghen.
Don Frederijck die wreede Tyran, Met al zijn Spaeniaerts end Gheschoren, Sy quamen daer voor Alckmar an, Sy meynden in te gaen, Maer sy mosten buyten staen, Haer meening was verlooren.
De Burgers van Haerlem hy me brocht
Mosten daer Pionieren, Sy zijn daer also wel besocht, Sy haddent niet gedocht, Met de doot elck meest becocht Het was quaed auontuere.
Den xviij. Decembris, wilt verstaen Omtrent te vier uren, Met xxiiij. Metalen stucken wel ghelaen Al om te schieten saen: Alckmaer heeft haer ontfaen, Dat zijt mosten besueren.
Met tien duysent mannen quamen sy rat Sy meynden Alckmaer te beslechten Sy schoten daer so dapper aen deen syde plat Sy maeckten aldaer een gat, Menige Spaengiaert aen tradt, Om Alckmaer te bevechten.
Een brugh hadden sy gemaeckt seer wel Om ouer die gracht te loopen: Maer sy ginck te gronde also snel, Sy was te cort hoort mijn vertel, De Burgers als Leeuwen fel, Smeten haer doot by hoopen.
Tkermen en krijten was so groot, Al vande Papen knechten, Drie groote Heeren daer bleuen doot, Bossu dat seer verdroot, Hy creech oock self eenen schoot Hy stont wel also slechten.
Wel achtienhondert men sach daer bloen,
Die ghequest en doot bleuen: Die Vroukens waren daer oock also coen, Van Peck en Teer maeckten sy hoen, Al om de Spaengiaerts hals te doen, Hoe waren sy doen verheuen!
Aldus worden sy voor Alckmaer geloont Wilt dit doch wel onthouwen, Met barnende pickhoepen worden sy ghecroent Denct hoet haer heeft verschoont Ghy steden v macht me thoont, Daer sy comen te benouwen.
Sy waren met de Buyt niet wel te vreen Die sy voor Alckmaer creghen: men sachse tot die billen doort water treen Seer diep wast tot allen steen, Nochtans mosten sy gaen heen, met haer gheschut waren sy verleghen.
Wy Burghers van Alckmaer ionck end oudt, Willen Godt dancken en louen, Dat hy ons heeft verlost van de vyanden stout, Die ons hadden seer benout, Hy heeft haer so verflout, Dat sy wech zijn gestouen.
Lof Prince Godt onse Vader goet, Door Christum uwen Sone ghepresen, Wy bidden v wilt ons noch bewaren soet, Voor dit spaensche ghebroet: Neemt ons in v behoet, Wilt ons beschermer doch wesen.
Cookies on Poetry Cove