Een nieu Liet ghepresen, kunt ghijt niet singen so meucht ghijt lesen. Vvel op ghy Spaengiaerden Die nu in Brabant zijn Hoe smaect v dat ghebraden, Daer toe den coelen wijn Ghy moet na spaengien met ghewelt Sonder paspoort sonder ghelt, Wochey slaet die spaeniaerts vry.
Wt spaengien quamen sy dringen Die spaensche Jonckers wijs Brabant wouden sy dwinghen, Die steden maken prijs, Of sy wouden zijn betaelt Den lesten penninck niet gefaelt Wochey slaet die spaengiaerts vry.
Die staten sonder falen Setten de Spaeniaerts eenen dach, Men sou haer al betalen Haer leeninge corten af, Dan souden sy weder na spaengien gaen De spaeniaerts spraken niet te verstaen, Wochey slaet die spaengiaerts vry.
Die spaengiaerts sonder falen Spraken ghelijcker hant, Ghy moet ons al betalen Van dat wy quamen int Lant
Die voor Alcmaer ende Haerlem groot De Guesen hebben geslaghen doot Wochey slaet die spaengiaerts vry.
Wat hebt ghy hier bedreuen Spraken die staten al Dat lant is ons gegeuen Spraken die spaeniaerts vals Tis v gegeuen van Duckdalf, Maer ghy en krijges noch niet half Wochey slaet die spaengiaerts vry.
Die hooch gheboren staten Wt Vlaenderen en Brabant Sy sonden haer plackaten Ouer in Gelderlant, Dat sy souden cleyn en groot Smijten al die spaengiaerts doot Wochey slaet die spaeniaerts vry.
Jn spaengien moeten sy al wat doenen Die spaensche Jonckers moy Gaen lappen oude schoenen, Hier gaen sy so parmefoy, Daer gaen sy met verscheurde cleeren Hier ist al Monseur mijn Heer Wochey slaet die spaengiaerts vry.
Al met verscheurde broecken Brocht haer Duckdalf int lant Sy moegen hem wel vloecken Hy heeft haer hier gheplant Hy at zijn gebraen alle daghen Nu werden sy met den spit geslagen
Wochey slaet die spaeniaerts vry.
Als sy nu zijn verdreuen Die Spaensche Jonckers knap Dan moghen sy wel leeren weuen Of roepen ketel lap, Oft schoorsteenveger sonder leer. Js dat niet schand voor sulcken Heer Wochey slaet die Spaeniaerts vry.
Sy menen te trecken na Spaengien Met haer ghestolen buyt So coemt de Prins van Oraengien Die slaet haer op de huyt Sy en sullen niet een nagel houwen Om haer eygen gat te clouwen, Wochey slaet die Spaeniaerts vry.
Ghy lansknechten sonder falen Dient die staten trou en hout Men sal v wel betalen Met siluer ende met gout, Ghy sult die spaensche Heeren altemael Ridder slaen met yser en stael Wochey slaet die Spaeniaerts vry.
Cookies on Poetry Cove