Op de wijse, Adieu Pieronne, ende Teroane. Ofte Bragart de France. Ach Heer hoe moet ick clagen Tgeene dat ic sie gebeuren Hoemen in dese daghen Dijn Schaepkens siet verscheuren Door s Paus erreuren, So loopen sy verdwaelt, Haer Herders die haer stueren Hebben den wech gefaelt, Vliedt Baals Papen, Babels Religioen, Die Christus arme schapen Met dreck van menschen voen.
So sy in Daniels tijen Versierders grouwel leerden, Door menschen fantasijen Het simpel volck verkeerden,
So sietmen ons gheleerden, Dat selue werck bestaen, Maer so sy doen vermeerden So salt haer noch vergaen. Vliedt Baals papen, Babels, etc.
Sy maken haer Afgoden, Die doen sy tvolck aenbeden, Twelc God claer heeft verboden Jnt woort na Moses reden, Sy bruycken vreemde zeden Recht na haer droomen vry, Soo haer Voorvaders deden, Twoort Gods verlaten sy, Vliet Baals Papen, Babels, etc.
Zy drijuen tvolc met hoopen Op eyghen deuchtsaem wercken: En stellen te vercoopen Den Hemel so wy mercken, Dit zijn s Paus Clercken Die tvolck so leyden blent, En Christus dienstich stercken, Wort onder haer gheschent, Vliet Baals Papen, Babels, etc.
Lof God tis beter comen, Dwoort can haer wel regeren, Haer doodtlicke verdoemen, Dat sietmen gants mineren, Nu is haer tlamenteren. En ons door Christum vreucht,
O Kinders wilt gauderen Jnt lustich licht verheucht, Vliedt Baals Papen, Babels, etc.
Al haer vermoort versieren Js nu int openbare, Den Prince der Princhieren Stelt haer boeuerie int clare, Haer dierbaer ware En wert niet meer ghesocht, Coemt wech vliet Babels schare, Trecht is ons wederbrocht, Vliedt Baals Papen, Babels, etc.
Wee v, ghy blinde ghuylen Baals valsche Propheten, Waer onder wilt ghy schuylen, Dijn decksel wert versteken, Dijn mate is v ghemeten, Ghetelt is uwen loon, Gods woord heeft by na gheten Tsyraet van Babels croon, Vliedt Baals Papen, Babels, etc.
Stelt v Duyuels practijcken, By dwoort der waerheyt reene, En siet of sy is te gelijcken, Oordeelt na dwoort alleene, Neen daer zijdy te cleene, Twort goet gemaeckt met cracht, Dus loopt gy dan als eene, Moetwillich inde gracht. Vliedt Baals papen, Babels, etc.
Veel meer had ick gheschreuen, Van haer gedroomde loghen, Maer elck heeft wel beseuen, Hoe dat sy weynich doghen, Schout nu na dijn vermoghen, Tfenijn, bout op Gods woort, Want dwoort, en Babels seghen En draghens geen accoort. Vliedt Baals Papen, Babels, etc.
Prince die so gheuoelen, En dwoort der waerheyt prijsen, Wilt haren dreck afspoelen, Laet v van Christo wijsen, Op dat ghy int verrijsen Met Christo onbeuleckt, Eewich moecht veriolijsen, Jn heerlickheyt perfeckt, Vliet Baals Papen, Babels Religioen, Die Christus arme schapen, Met dreck van Menschen voen.
Cookies on Poetry Cove