op de wijse vanden ouden Hillebrant. Amsterdam. O Radt van auontueren Wildy schier ommeslaen, Mach ons geen hulp gebueren: So moeten wy vergaen, End dit doet ghy Enchuysen Wy wijtent v alleen, Alle dees vreemde abuysen Brengt ghy int lant ghemeen.
Enchuysen. Wat wilt ghy op ons kijuen, Ghy ste van Amsterdam, Hadt ghy ons by willen blijuen Eer Ducx voor Haerlem quam, Dit roouen en dit branden En waer ons niet gebeurt, Die Croon van dese Landen Hadt ghy noch onghetreurt.
Amsterdam. Jck en had v niet begheuen
O ghy Enchuysen coen, Maer den Coninck had gheschreuen Dat ick dat moste doen, End oock om te beschermen Het heylich Roomsche Rijck, Al ist dat de Landen dus verarmen, Sy en hebben gheen gelijck.
Enchuysen. De Coninck van Hispaengien sal oock ons Coninck zijn, Maer den Prins van Oraengien: Onsen stadthouder fijn. Met hem so willen wy strijden Het is een Christen man, Gods Woort tot desen tijden, Dat nemen wy met hem an.
Amsterdam. Wilt ghy den Prins beminnen Hy can v helpen niet, Dus wilt v wel versinnen Oft v naect groot verdriet: Aenmerckt Haerlem de stede, Hoe sy geuaren is, En noch wel ander mede, Wy zijn v veel te fris.
Enchuysen. Dat ghy dees Steden hebt ghewonnen Het coemt al anders by, Ghy hebt altijdt begonnen
Met v verradery, Twelck v Papen en Cardinalen hebben seer fray gheleert, Maer hier naer sult ghijt betalen So verre ghy niet bekeert.
Amsterdam. Hoe souden wy anders gheloouen Als ons Voorouders deen? Neen, al soude comen bouen Den alder ondersten steen, Al souden wy oock verliesen Dats onsen Stadt gheheel, soo sullen wy altijts kiesen Tweedracht ende crackeel:
Enchuysen. Amsterdam ick woudt v raden Dat ghy thooft legt inden schoot, En valt in ons ghenaden, soo hebt ghy gheenen noot, V Backen en v Brouwen Dat is toch al ghedaen, Die Zee sullen wy in houwen, Ghy conter ons niet wtslaen.
Amsterdam. Al hebdy nu ghegrepen Onsen Stadthouder net, Met een deel van onse schepen, Wy willen noch al bet, Wy doruent noch wel waghen, Al waerdy noch so quaet,
En hopen in corten daghen Te verwinnen onse schaet.
Enchuysen. Coemt wt met uwen spinnen Wy setten v in ons deer, Ghy sulter gheen prijs met winnen Als op de Haerlemmer Meer, Ten sal v niet ghebueren, Al quaemdy noch so fel, Wy hebben binnen ons Mueren so menich fray Bootsghesel.
Amsterdam. Godt is wonderlick in zijn wercken, O ghy Enchuysen spreeckt niet bout, Hy helpt altijt den stercken Elck een seer menichfout, Spaeniaerts ende Walen Die staen ons oock ter handt, Wy connen oock wel halen Den Hoochduytsman in het Lant.
Enchuysen. Amsterdam ghepresen Laet doch sulck roemen staen, Ghy moet bedoruen wesen, Ghy hebbet v selfs ghedaen, Om dat ghy gaet versaken Uwen Edel recht Lantsheer, En stelt al v vermaken In Duckdalba den Verreer.
Amsterdam.
Js duckdalue een Verrader Wy kennen hem voor goet, Ghy hebter noch wel quader Daer ghy mede te velde moet, Nu willen wy swijghen stille Laet varen dese quest, Ghebruyckt al uwen wille Wy sullen oock doen ons best.
Cookies on Poetry Cove