op de wijse ghy amoreuse Gheesten. Och Amsterdam, och Amsterdam Ghy zijt so schoonen ste, Godt is op v gheworden gram Ghy soect niet dan onvre, Hy wilt niet langher lijden Dat ghy zijn Christen dus vermoort Nu ende tot allen tijden, Dies ghy noch sult wesen verstoort.
Wat moort hebt ghy ghebrouwen: Noch en houwet ghy niet op, Onder Mannen en Vrouwen, Dus valt die straf op uwen cop Ghy hebtse doen ontlijuen, Die hier beleden Godes Woort, By vieren ende by vijuen, Dies ghy noch sult worden verstoort.
Waerom hebt ghy inghenomen Dit Jesabels gebroet te hoop: Hadt ghy ons Prins te gemoet gecomen Twaer v veel beter coop,
Nu zijt ghy tot een roof ghegeuen Als Jerusalem rechte voort, Ghy meucht wel vreesen ende beuen, Want ghy sult noch worden verstoort.
O Dochter van Zodoma gheweken, Ghy boeleert met den Spanschen Tyrant V Hooft hebt ghy altoos wtghesteken Bouen alle steden in Hollant, Mocht uwen will triumpheren, Ghy brocht heel Hollant in discoort, Neen, Godt wil sulcks niet begheeren, Maer ghy sult noch worden verstoort.
Ghy seydet door uwe clachten Soudt ghy maken eenen dieren tijt, Dat wy van honger souden versmachten, Maer ghy crijchse seluer so subijt, Wy hebben greyn gecreghen Wt het Oosten en wt het Noort, En ghy sidt seer versleghen, En wort altemet verstoort.
Waer is v Neeringhe, v weluaren, U Triumpheren, v cyraet? Waer sietmen de schepen paren By v vol rogghe, en ander Zaet: Fortuna is v ontvloghen, Die gaten zijn te hoop versmoort, Tnet is ouer thooft ghetoghen, Dies ghy noch sult worden verstoort.
Die Bloetgierige Spaengiaerden Domineren by v Dochters reyn,
Papen en Monicken vol onwaerden Eten v Coren en v Greyn, V Specery en v Juweelen Leggen vermooren half vergoort, V schoone huysen en Casteelen Worden altemet verstoort.
Ghy moecht v niet schoon wasschen, Al hadt ghy al twater inder Zee, Ghy leght geuallen inder asschen, Beclaecht v ras als Niniue, En laet v sonden smerten, Springt haest wt desen oort, Ontfangt ons Prins met blijder herten, Of ghy sult noch worden verstoort.
Princelick wil ickt v raden Ghy Wtuercoren stadt, Dat ghy valt in s Princen genaden, So wort ghy niet meer becladt, En wilt niet meer crackeelen, Na Gods heylighe woorden spoort, So moechdy met Hollant spelen, Of ghy sult noch worden verstoort.
Cookies on Poetry Cove