Op de wijse: vanden Edelen Lantman goet. Bisschoppen en Cardinalen Prelaten end Abten vet Coemt voort en wilt niet dralen Brengt uwen heylichdom met Mispapen end Canonicken Sophisten wijs end vroet Coemt al ghy Nonnen, ghy Monicken Coemt oock Jesuiten soet Met al v Roomsche ghebroet.
Ghy Papisten wt allen hoecken Maeckt v oock op den ganck End wilt my nu versoecken Vwen Vader die Paus is cranck, Te bedde ben ick gheleghen Als mensche desolaet, Laet loopen in alle weghen End soecken eenighen raet Oft ick worde desperaet.
Al door de nieuwe Leere Come ick in dit dangier Sy wast soo lancx so meere Jn allen Landen schier, Tvolck wilt Schriftuere lesen Sy spreken met onuerstant Sy willen niet langher wesen Subieckt den Babel, want Hy staet ghebout int zant.
Die in voorleden tijden
My hielden voor eenen Godt die helpen my nu bestrijden En houden met my den spot mijn Wetten sy vertreden Als gheboden seer onreyn sy en willen niet langher aenbeden de sancten groot noch cleyn Al in dit Aertsche pleyn.
Den Antechrist sy my noemen Wie hoorden oyt meerder quaet? die misse sy verdoemen Als een werck van booser daet dat Vagevyer sy versaken, dat Offeren heeft ghedaen die Oorbiecht sy oock laken sy en willender niet meer aen, dat cost my menighen traen.
Die Wtuaerden sy misprijsen Als een onnoodich werck de sancten sy verwijsen Al met Schriftuere sterck mijn Kercke sy diffameren Al waert een roouers cot mijn Priesters sy blameren End houden voor Clercken bot Al waert des duyuels rot.
Sy achten mijn Cramerije Mijn Afflaets Brieuen siet Voor enckel dieuerije, Js dit niet groot verdriet:
Sy en willen niet meer coopen Mijn Cramen gaen sy voorby Tot Christum ist dat sy loopen En soecken hem voor my Van mijn ware roepen sy fy.
Voor onsen Godt sy vlieden Hy is van Broode teer die wy den crancken lieden draghen met grooter eer Al wat wy bellen oft clincken Sy gaen al haren trant Sy en willen niet langher hincken Sy seggen: wy hebbent verstant Spaus Broot is aenden Tant.
De Cloosters end Conuenten Sy en achtense niet altoos Sy segghen: Het zijn de Tenten der Sodomiten boos Sy houdense voor Mestvercken de Monicken seer deuoot Sy zijnt die niet en wercken End eten der Armen broot, dit roept cleyn ende groot.
Tvolck is op ons verbolgen snel End maken ons fameus Sy heffen teghen ons de Wapen fel Met moede furieus Eerst zijn geuallen onse santen Wy moeten (ducht ick)volghen naer dit hoortmen aen alle canten,
Den volcke segghen openbaer Sulcks vreese ick oock voorwaer.
Soeckt list, raedt, ende practijcken Ghebruyckt foortse ende ghewelt, Laet Nigromancie blijcken Op dat wy houden dat Velt Wilt uwe Const nu baren En spaert Siluer noch Gout Oft wy moetent laten varen Dat wy langhe hebben ghebout Want het Volck wort veel te stout.
Satan Prince vander Hellen Wy bidden ons doch bystant doet Teghen die ons dus quellen Ghetrouwelick ons behoet Dees nieuwe Predicanten Bederft oock inden gront Diet bedroch van onse Santen Den Lieden maken cont Want sy makent ons veel te bont.
Cookies on Poetry Cove