Op de wijse van Dueren Nederlant spreect. Met recht mach ick wel suchten Nederlant aen elcken oort, Vanden quaden gheruchten Diemen nu daechlicx hoort: Oorloghen, Dieren tijt, watervloet, Peste, Tyrannen seer verwoet
Regeren in mijn daghen: Sonde baert my dees Plaghen.
Pharao is nu int leuen, Antiochus thoont zijn quaet, Nero heeft nu ghegheuen Sijn fel moordadich Zaet: Dit is Duckdalba inghestort, Die mijnen Coninck doet te cort Jn zynen schoonen Landen, Die hy gants maect te schanden.
Men sach hem daer ombringhen Den Adel seer hooch gheacht: De staten cost hy dwinghen, Dat sy quijt zijn haer macht! De Preuelegien zijn te niet: Menich vroom man lijdt groot verdriet Moet lancks den Lande sweruen, Of aen een galge steruen.
Jck can niet wijt vertellen, Twelck yeghelijck is bekent, Hoe men mijn Volck sach quellen, Berghen en Mechelen ient: Zutphen twelck oock veel was beloeft, Naerden het welck gants wert berooft, Daer Moeder en Kint bleuen, Gheen Turck heeft sulcks bedreuen.
Door Diericks Vries toeraden, Met seer vele van Amsterdam, Wou hy Haerlem oock schaden, Dies hy daer voren quam,
Lucien auont met ghewelt, Menich scheut is daer op ghestelt, Ende stormde seuenmale, Doch liet zijn principale.
De Borghers sonder vertsaghen, Waren daer seer wel ghemoet, Om voor Gods Woort te waghen, Lijf, wijf, kint ende goet: Hoe wel de stadt was onuersien, Sy dochten, tcan door Godt gheschien, Dat ons de Prins sal helpen Noot ende honger stelpen.
De Stadt sy vroom in hielen Tot op Margrieten dach, Jn cleynen moet sy vielen, Alsmen daer commer sach Van Coren, Bier ander nootdruft, Doch so sachmen smenschen vernuft Met list hun seer vercloecken, Noot doet veel listen soecken.
Macht, moet, is hun besweken, Als meerder wert haren noot, Drie daghen en ses weken, En hadden sy bier noch broot, De vroukens waren in grooten last, Veel kinderkens hebben gevast Die inder wieghen laghen, Diemen seer hoorde claghen.
Gheen spijs wert meer geuonden, Als sy niet werden verlost,
Van Catten ende Honden, Peerden was haren cost, Raepcoecken, ende menighe huyt, Met veelderhande groene cruyt, Twelck den Mensch wel sou schaden, Moest haren buyck versaden.
Als s Princen hulp faelgeerde, Die te seer haestich quam aen, De Tyran Triumpheerde, Met Haerlem wast ghedaen: Een yeder heeft sick reet ghemaeckt Om wt te gaen daer wert ghewaect Aen de Fuyck met veel Schepen, d'Wttocht was wel begrepen.
Als die niet woude lucken, Door eenes verraders mont, Siende thonghers verdrucken, Maeckten sy een verbondt: Men loefde hem Berghen van Gout, De welcke werden een crom hout, Of sweert voor den Lantsknechten, Diemen soo vroomlick sach vechten.
Daer isser om ghecomen Twee duysent int ghetal, Ghenade soude vromen Den Borgher ouer al: Dit scheen seer groot zijn voor de hant Dan twas vol van dubbel verstant, Als ghy hier na sult mercken Aen des Tyrans listighe wercken.
Hy woude niet toebringhen De Borghers als noch so haest, Om te beter te dwinghen Die Steden aldernaest Hy sach wat zijn Moort had ghewrocht Jn Naerden, dus heeft hijt besocht Nu op een ander wijse, Weynich tot zijnen prijse.
Als hongher had ghewonnen Tvroom Haerlem, so was den raet, Om t Vlie, twelck wert begonnen, Dan Godt versach de daet: Daer na so trock hy na Alckmaer Dit heeft hy oock beleghert swaer, En in die loecht gheschoten, Twelck hem daer na heeft verdroten.
Daer moesten Pionieren Die Haerlemsche door ghewelt: Met schimp, dat haer manieren Tot Crijch waren gestelt: Hier toont hy zijn genade bloot: Gheen Borger bringt hy self ter doot, Dan Vrient moet Vrient vermoorden, Siet hier ts Tyrans accoorden.
Men sach Alckmaer bestormen, Wel vijf uren lanck met cracht, Als Vlieghen ende Wormen Werden Menschen gheacht: Elck Borgher heeft hem wel gheweert,
Niemant van hun en heeft begheert Sijn Lantsknechten te misten, Na des Tyrannes listen.
Cookies on Poetry Cove