op de wijse van Haerlinghen. Vvie wil hooren een nieu liet, Wat int Jaer dryentseuentich is gheschiet, Hoort toe ick salt v verclaren, Van die Antwerpers, hoort mijn bediet, Hoe dat sy zijn gheuaren:
Die Spaengiaerts hebben gelt wtgesant, Jnt Sticht van Bremen wel bekant, Dit hebben de Bremers vernomen, Twee Croonen gafmen daer op die hant, Al om Tantwerpen te comen.
Dit heeft verhoort een Capeteyn vailiant Jn Zeelant is hy wel bekant, Te Vlissinghen binnen der steden, Hy is ghetoghen in Brabant Al daer quam hy met vreden.
Hy quam Thantwerpen aen dat Lant Als Bootsman so was hy onbekant, Hy heeft maentgelt ghecreghen, Al op den Admirael vaeliant, Hoort wat hy heeft bedreuen.
Die Antwerpers waren wel bedacht, Met die Spaeniaerts seer hooch van pracht, Tsestich schepen sy daer toerusten, Daer mede te comen in Zeelant,
Het most haer wel ghelusten.
De Schepen waren nu toegherust Met vijfhondert Metalen stucken met lust, Alsomen mocht aenschouwen: Maer het gheschieden in corter stont, Dat sy quamen int benouwen.
Sy hebben daer bedreuen groote pracht Met Vlagghen en Topstanders wt aller macht, Een Cat was daerin gheseten, Tot spijt van de Vlissinghers veracht Dat sy de Worst souden eten.
Als dese Schepen waren bereyt, Capeteyn Worst nam een afscheyt, De Catte woude hy verwachten, Hy heeft tot die Weerdinne geseyt, Na den Capeteyn mach ick niet wachten.
Capeteyn Worst was seer wel bedacht, Hy heeft de weerdinne een brief gebracht Op dattet soude comen int openbaren, Dat hy den Admirael hadde toegherust, Na Vlissinghen is hy ghevaren Het gheschiede in eenen corten tijt, Hoe dat Thantwerpen quam een groot gecrijt, Van also droeuen Maren, Hoe dat Capeteyn Worst haren vyant, Na Vlissinghe was gheuaren.
De Vlissinghers hebben haer toegerust, De Catte verwachten met aller lust, Opde Schelde zijn sy ghetoghen, Oft de Catte mocht zijn belust,
Want het was in haer vermoghen.
De Catte tooch wt met aller pracht, Om de Worst te crijgen met al haer macht Godt weet hoe sy zijn gheuaren, Doe sy quamen ter haluer scheld, Dat werden sy wel gheware.
De Worst die lach daer wel seer heet, Tot vechten was sy wel bereet, Met ketten end oock met klooten, Dat de Catte den brant verdroot, So heeft de Worst geschooten.
De Worst brande daer met sulcken cracht, Dat de Catte was seer qualick bedacht, Haer halue Jongen zijn na Bergen geweken Daer is de Worst met aller macht De ionge Catten na ghestreken.
Nu rade ick alle Catten stout, Dat sy oock niet en comen boudt, Om de Worsten te verslinden, Want sy zijn daer den Katten te sout, Dat sullen sy wel beuinden.
Cookies on Poetry Cove