Op de wijse: Te Mey, als alle vogelen singhen.
AL lijd ick druck en swaer ghequel,
Al is mijn lijden noch soo fel,
Rebel wil ick niet wesen:
Want Godt is goet,
Zijn oordeel moet
Altijt worden ghepresen.
Al wordt ghy nu bespot, versmaet,
Begeckt, beclapt, verdruckt, ghehaet,
Hoe 't gaet, zijt wel te vreden,
Maeckt geen ghecrijt,
Gheduldich zijt,
't Coemt al tot salicheden.
Al slaet u Godt in gelt, en goet,
In naem, in faem, in vleysch, in bloet,
Hout moet in u vijf sinnen,
Den Heer verbeyt, Lief volcht na leyt,
't Coemt al wt rechter minnen.
Behout inwendich stercken moet,
In lief, in leet, in suer, in soet,
In hebben, en te derven,
Hout dese leer,
In sucht, in seer,
In leven, en in sterven.
Geen quader dingh, als eygen wil,
't Maeckt tusschen ons, en Godt geschil
't Beledt zijn soet invloeyen,
Den wil versaeckt,
En Godt gesmaeckt,
Dat doet de deuchden groeyen.