Op die wijse: Ionckvrou ick u vragen laet, &c. MYn Heer, mijn Godt, mijn herte, Mijn deel, mijn ewich lot, Mijn troost in druck en smerte, Mijn Bruydegom, mijn Godt, V stemme soet, Heeft mijn gemoet, Beweegt met liefden gloet. V stemme, &c. Heer hoe sal ick vergelden Al u weldaden groot V siel ghy voor my stelden, Voor my storft ghy de doot, My langh gesocht, Met bloet gecocht, En tot u Bruyt versocht. My langh, &c.
V liefd' is ongemeten, Dat ghy Godt my bemint, My die u duck vergeten, My u onweerdich kint. Wat sal ick Heer, V geven weer, Voor dese liefd' en eer? Wat sal, &c. Wt 's werrelts list en lagen En wt des duyvels net, Hebt ghy my selfs gedraghen In desen staet geset, O wijsen raet, O goeden staet Die recht ten Hemel gaet. O wijsen, &c. Adieu dan 's vleeschs geneuchten, Wech silver, gelt, en goudt, Wech al dat 't hert in suchten Van mijn beminden houdt, Wech hogen staet, Wech schoon cieraet, Wech werelts valsch gelaet. Wech hogen, &c. Comt Jesu die met minnen, Mijn hert hebt heel doorwont, Mijn siel, mijn hert, mijn sinnen, Geef ick door dit verbont, Neemt desen pant, Van u Bruyts hant, Die door u liefde brant. Neemt desen, &c.
Wanneer sal ick genieten V Bruydegom voor al, Sal ick langh tranen gieten In dit traen-vloedich dal? Mijn herte haeckt, Mijn siele snaeckt, Dat sy by u geraeckt. Mijn herte, &c. Maer want ick noch moet beyden, Doet my soo leven nu, Dat als ick hier sal scheyden Mach comen recht tot u, Mijn Bruygom schoon, Der Maegden kroon Verleent in 's Hemels troon. Mijn Bruygom, &c.
Cookies on Poetry Cove