Op de wijse: Och light ghy nu en slaept. O Eewicheyt, o eewicheyt Mocht ick u wel bedencken, Die innerlijck in ydelheyt,
Door s'vleesch begeert versencken. Die innerlijck, &c. Ten mach nu niet dat lichaem mijn Wat ongemacks hier lijden, Och 't sal hierna in 's Hemels schijn, Sich wel soo hooch verblijden. Och 't sal, &c. Soo moet het Cruys ghedragen zijn Oft hier, oft na dit leven, Men moet verwachten d'Helsche pijn, Of sich tot lijden geven. Met moet, &c. Och hoe langh duert de Helsche pijn, 'k Tel hondert duysent jaren: En noch soo veel, 't is maer begin Waer dencktmen doch te varen ? En noch, &c. Ick denck laes, waer gevaren zijn Voor dertich, veertich jaren, Die hier de Croon des werelts schijn, In weeld' en pracht verkoren. Die hier, &c. Wat ist voor corte ydelheyt, Sy hebben brandt tot loone, In eewicheyt, o eewicheyt, Int Helsche vuyr te woone. In eewicheyt, &c. Ey lichaem, als ghy sterven moet, Wat helpt dan hier braveeren ? Och niet, soo soeckt dat eewich goet, Wilt u met my bekeeren.
Wilt met my nemen uwen ganck Tot Christi doornen Croone, En dragen nu dat Cruyce lanck, Adieu, seght werelt schoone. En dragen, &c. Al is mijn jeuchde jonc, ende seer groen Ick wil my gaen bekeeren, Tot Godt, en penitency doen Adieu met u playsieren. Tot Godt, &c. Adieu, in Jesus lijden soet, Wil ick met Godt, steets rusten, Laet, Heer, in my u gratie goet Dooden al 's werelts lusten. Laet Heer, &c. Ey hoe soet sal 't int leste sijn, Als hy ons sal geleyden, In eewicheyt, o Heere mijn, Laer my niet van u scheyden. In, &c. Noch vleysch, noch werelts lieflicheyt Laet my van u afkeeren, Wech werelt met u ydelheyt, Wech met al u playseeren. Wech werelt, &c. Want vreuchd vergaet in oogenblijck Daer na comt eewich lijden, Dat Cruys duert oock een oogenblijck, Dan comt eewich verblijden Dat Cruys, &c. Och mocht ick u, o eewicheyt, Mocht ick u wel bedencken,
Rijckdom, eer, lust kreegh haest afscheyd Hoe schoon sy my oock blincken. Rijckdom, &c.
Cookies on Poetry Cove