Op de wijse: Alst beghint. NAer den opganck der Sonnen claer Doe Christus nu verresen waer Hebben specerien ghecocht Dry Marien en 't graf besocht. Alleluia, Alleluia, Alleluia. Dus gaend' in liefde niet verkout Spraken onder haer gansch benout, Wie sal ons nu wentelen af Den swaren steen al van het graf ? Alleluia, &c. Groot wonder sy vernomen daer Den steen daer van gewentelt waer, En sagen een Engel bereet Blinckend' en schoon met wit ghecleet. Alleluia, &c. Den Engel sprack, ghy vrouwen goet Weest niet bevreest sijt wel gemoet, Ghy soeckt Iesum met droefheyt groot Hy is verresen vander doot. Alleluia, &c. Comt siet tot meerder sekerheyt
Die plaets daer hy in was gheleyt, Maer gaet tot sijn Discipels voort Verkondicht haer dit soete woort. Alleluia, &c. Maer eerst brengt Petro dit bescheyt, Die treurt en sijne sond' beschreyt, Hy sal nae sijn beloften saen, Voor haer in Galileen gaen. Alleluia, &c. Haer hert met blijdtschap was bevaen, Sy gingen heen na sijn vermaen, En hebben nae 't Enghels ghesicht, Haer boodschap metter haest verricht. Alleluia, &c. Gelooft, ge-eert, gebenedijt, Moet wesen nu en alle tijt, Iesus die all' des doodes macht Verrijsend' heeft tot niet ghebracht. Alleluia, &c. Met blijdschap en met soeten toon, Sy Godt ghelooft in s'Hemels throon, En inde gansche werelt vry, Laet nu klingen dees melody. Alleluia, &c. Die Engelen Choren, Cherubin, Heyrcrachten, Thronen, Seraphin, Die Engels schier sonder getal, Singen met vreucht en groot gheschal. Alleluia, &c. Op Orgels, Cyters, snarenspel, Herpen, Trompetten, Sincken hell', Wort schoon ghespeelt, en met practijck
Wort nu gesongen int Musijck. Alleluia, &c. Op aertrijck alle Christenheyt, Tot vreuchd eendrachtich is bereydt, En u ter eeren singt en speelt, Van groot en cleynen wort gequeelt. Alleluia, &c. Wy bidden u verwinner soet, Dat gh' ons vrolijck verrijsen doet, Brengt int Hemels Ierusalem, Daer wy singen met luyder stem. Alleluia, &c.
Cookies on Poetry Cove