Op de wijse: Ick segh het sijn mijns liefs bruyn ooghen. O Maria fonteyne vol deughden Wy eeren u met hert en vreughden Want ghy ons Patronesse zijt, Alle gheslachten moeten u prijsen,
En sonderlinge eer' bewijsen Godts lieve moeder gebenedijt. Alle, &c. Reyn, onbevleckt, suyver van sonden Sijt ghy perfect en maeght gevonden Voor Godt een spiegel onbesmet: Daerom had hy in u behagen, Die ghy met vreughden hebt gedragen In u Maeghdelick lichaem net. Daerom, &c. Ghy waert seer wijs in Godt te minnen, Want u verstant dat was van binnen Verlicht al met Gods gracy rijck, Voorsichtich waert ghy in u wercken, V groote wijsheyt kostmen mercken Wt uwe woorden soberlijck. Voorsichtich, &c. Ootmoedich waert ghy wtghelesen, Als ghy u selven noemt te wesen Een Dienst-maeght slecht des Heere schoon: Daerom zijt ghy met grooter weerden, Seer hooch verheven vander eerden Hier boven in des Hemels throon. Daerom sijt, &c. Ghy hebt gelooft Godts woort waerachtich, Door u groote gelove krachtich, Hierom zijt ghy salich geacht, Want ghy en waert niet twijfelachtich. Dus heeft die Heere Godt almachtich
Sijn beloften in u volbracht. Want ghy, &c. Ghy waert devoot in u gebeden, Seer vierich met ootmoedicheden Quamen sy voor Godts majesteyt. En in Godts woort te mediteren Waert ghy verlicht int contempleren Met groote stille aendachticheyt. En in Godts, &c. Gehoorsaem oock in goede dingen, Waert ghy bequaem om te volbringen Altoos den wille Godts perfect: Men hoorden u niet murmureren, Niemant en sach u rebelleren V Overheyt waert ghy subject. Men hoorden, &c. Ghy hebt bemint willich armoede, Een slecht habijt weynich van goede, Dus dienden ghy den Heer ghetrouw: Want uwen Soon op deser eerden Soo veel niet hadt, noch oock begheerden, Daer hy zijn hooft op rusten sou. Want uwen, &c. Verduldich waert ghy in u lijden, Ghy danckten Godt tot allen tijden In alle druck en tegenspoet. Met blijdtschap hebt ghy dat ontfangen, Als eenen schat met groot verlangen Van die handen des Heeren goet. Met blijdtschap, &c.
Seer Godtvruchtich in alle manieren, Placht ghy te sijn int conversieren Tot alle menschen arm en rijck. Om die bedroefden te vertroosten, Te leeren met goede propoosten Waert ghy seer goet en vrindelijck. Om die, &c. Met groote droefheyt waert ghy bevangen, Doen ghy u lieven soon saecht hangen, Verwont aent Cruys naeckt ende bloot: Hierom u herte most doorboren, Als Simeon u seyd' te voren Het bloedich sweert der droefheyt groot. Hierom, &c. Princesse onse Patronesse, Weest onser aller Voorsprakersse By Jesum uwen Soone jent, Dat hy ons hier gracie wilt geven, Dat wy Godtvruchtich mogen leven In dees tien deughden excellent. Dat hy ons, &c.
Cookies on Poetry Cove