Op de wijse: Wilder als wilt, &c. WIlder als wilt, wie sal my temme[n] Plach ick te singen vroech en laet Ick heb gehoort na Christi stemmen, Hy roept my tot een and'ren staet. Ick heb, &c. Ick was soo wilt, 't mocht aen m[y] blijcken, Als een vogel vliecht inde locht
Maer Jesus met sijne pracktijcken, My soetgens in zijn nette brocht. Maer Jesus, &c. Vry, ledich, los en ongedwongen, Mijn wil volchden ick over al: Dus quam ick snel in 't slijck der sonden, Dat ick altijt beclagen sal. Dus quam, &c. Cupido quam my te beminnen, En te bestrelen met venijn, Ick geef aen Jesus nu mijn sinnen Om te genieten zijn aenschijn. Ick geef, &c. O Heere mijn, laet my mijn sonden, Tot allen tijt beschreyen fijn, Verlicht mijn hert, om te doorgronden Die wonden swaer der zielen mijn. Verlicht mijn, &c. O Heer mocht ick u recht beminnen, Wt 's herten gront met liefde puer, Sterct my met cracht om te verwinnen Mijn sinnen wilt, en seden stuer. Sterckt my, &c. Heer Jesus leert my mijn wil breken, Al valt 't my somtijts hart, en swaer, Want ick sien hier veel gebreken, Dat ick met rust u volge naer. Want ick, &c. Wilder als wilt, heb ick gesongen Nu keer ick, met Godt, sin en toon, Want Godes geest heeft my bedwongen En my getemt met g'naden schoon.
Want Godes, &c. Nu dan mijn ziel in al u dagen, Geeft uwen Bruydegom eer, en lof, Soeckt hem in deucht steets te behaghen Adieu dan werelt asch en stof. Soeckt hem, &c. Heer Jesus zijt mijn recompencie Als ghy komt oordeelen in den throon, Dat ick mach hooren u sententie, Comt hier mijn bruyt ontfangt u croon Dat ick, &c.
Cookies on Poetry Cove