Op de wijse: Het was een Iongher helt. ICk mach wel clagen, Heer, En schreyen langs hoe meer Dat ick u al mijn dagen, Vertoornt heb also seer, In 's werelts lof en eer, Had ick al mijn behagen. Vertoornt, &c. Den Mammon triumphant, Met weelden abondant, Heeft my, o Heer, bedrogen, Het vleesch aen d'ander kant De werelt inconstant, Sy hebben al gelogen. Het vleesch, &c. Door haren boosen raet Word ick seer obstinaet, En in mijn quaet ghepresen: Tot allen overdaet, En alle sonden quaet Woud ick altijt een wesen. Tot allen, &c. Ick heb de werelt wijt, Ghedient soo langhen tijt, Noyt was mijn hert te vreden
Maer vol van haet en nijt, Met eenen swaren strijt, Vervult met bitterheden. Maer vol, &c. Ick wil my keeren af, Want 't is al stof en kaf, Om mijn ziel te verliesen, Het is al verckens draf, Vol stancks, gelijck een graf, De deucht die wil ick kiesen. Het is al, &c. Ick bid u Heere mijn, Wilt mijns genadich zijn, Door u vijf roode wonden, Keert af dat helsch venijn, Zijt doch mijn Medicijn: Ick ben een vat vol sonden. Keert af, &c. O Vader eewich Godt O Godt van Zebaoth, Wilt my, o Heer, doch leeren, Want ick ben slecht en bot: Ghy zijt dat beste lot Tot u wil ick my keeren. Want ick, &c. Ick roep u Vader aen, Als eenen Publicaen. Wilt my, o Heer, ontfermen, Van 't quaet wil ick afstaen Als David heeft ghedaen Aenhoort mijn bitter kermen. Van 't quaet, &c.
Al zijn mijn sonden groot, En wegen swaer als loot, Wilt my, o Heer, ontladen Wilt door u bitter doot, My helpen wt den noot Want groot zijn u genaden. Wilt, &c. Ick bid u Jesu soet, Al door u dierbaer bloet, Wilt my u gracy geven, Helpt my wt 's werelts vloet Schenckt my van 't Hemels goet 't Welck is dat eewich leven. Helpt my, &c. Oorlof mijn broeders al, Al komt ghy tot den val Keert u tot Godt hier boven, Want hy u maken sal Een kint van zijn getal, Om hem altijts te loven. Want hy, &c.
Cookies on Poetry Cove