Op de wijse: Jerusalem ghy schoone stadt. WAcht u ghy Catholijcken wel Van al des menschen valsche treken: Die wt Godts Kercke u rebel Wil trecken door sijn lieflick spreken. Wat inde Roomsche Kerck geschiet, [N]oemt hy te wesen sotternye, [I]st dat hy daer een beelt aensiet
Dit is, roept hy, afgoderije. Als oft wy waren alsoo sot, Dat wy de beelden als afgoden Betoonden eer, die toecoemt Godt, 't Welck inde Wet Godts is verboden. Die beelden in ons Kercke staen, Om dat wy souden zijn gedachtich: Hoe dat Godts vrienden, voorgegaen Ons dienen voor een spiegel crachtich. Ist dat ghy in de boecken meucht Der heyligen vroom wercken lesen, Greg. lib. 7.Re. ep. 109.Een schildery die leert de deucht, Mach die der leecken boeck niet wesen ? Een beelt brengt ooc zijn vruchten voort Want 't kan ons hert tot God verwecken Ja dickwils beter dan het woort Salt ons tot een goet leven trecken. Exodi. 25.Heeft Godt niet in de oude wet Twee Cherubijnen selfs doen maken, Die in den Tempel sijn gesedt, Die vol was van gesnede saken ? Verheften Moses het serpent, Werden gesont, die dat aensagen, En wast al goet ? dan oock bekent, Dat Godt de beelden niet mishagen. Een mensch is dat Gods beelde niet, En machmen dat wel eer bewijsen ? Als dit een ander beelt geschiet Waerom so wilt ghy dat misprijsen ? Men maect een beelt van hout en steen 't Welck sijn onredelicke dingen, Doetmen die eer, die coemt alleen
Aen die sy ons voor oogen bringen. Ist datmen 's Conincx beelt geeft eer Ist 's Conincx schande dat te breken, Voorwaer Gods beelden sijn veel meer Onteertmen die, Godt sal het wreken. Ghy Catholijcken hier wt leert, Datmen die beelden eer mach geven, Maer so, dat alsmen die vereert, Gods dienst die niet wert toe-geschreven. Dees onse leering is seer out, In Gods Kercke, die niet kan liegen, Al dat sy leert, voor seecker hout, Sy sal u nemmermeer bedriegen.
Cookies on Poetry Cove