Herfst - Liedt: Op de wijse, Swinters Somers even groen. GHy Borne Nimphen, Vliet Nayaden, Steeckt blijde nu dijn hoofden uyt,
Want Triton komt met vocht versaden, Die retigh dorr' met loof end' kruyt Benaut is door den vocht verslinder, Dats Phaeton, die door stoutheyt groot Ded' u end' oock Driaden hinder, Maer loon zijns wercks is nu zijn doot. 2. Ghy droeve Nimphen meught herscheppen Met groot verlangh nu aessem we'er, Ghy Stroomen oock u vlietigh reppen, End' doen na wensch een blijden keer, Om laven dorstighe Vliet-Goden, Die langh daer naer hebben verlangt, Elcks drooghe hert, dien aengheboden Dienst, gheerne danckelijck ontfangt. 3. Nu Pluto dertel met ghenuchten Ooghweyigh op zijn Waghen rijdt, Doet voeren Ceres voedtsaem vruchten Ter schueren in, met lust end' vlijt, Den overvloet doet hem soo blaken, (Of schoon Ops dochter is beroert) Dat hy wellustigh wil ontschaken Proserpina, die hy med' voert. 4. Siet, Bacchus sterck komt ooc geladen Met dick ghebeyde trossen gaen, Zijn blijd' ghelaet met vrye daden Hy elck een mildelijck biedt aen, Zijn druck verdrijvigh sap seer kluchtigh Verheughen doet het Mensch ghemoedt, Dies droefheyt, angst, en zorge vluchtigh, Vertrocken henen met der spoet. 5. De suyver Ceres nut end' deughdigh In vruchtbaer Vestas huys men doet, Op dat met Phoebus' tweelingh jeughdigh Sy kom' in nieu bekrooningh zoet, End' Milon schijnt zijn maght oock proeven Met yserighen harden vuyst,
Veel dieren sterck tot 's Menschs behoeven, Met felle kracht hy neder buyst. 6. In vollen Herfst elc kloec huys-zorger Kan hem van alles soo voorsien, Dat als ghe-win-teer (als verworgher Van voorraet) komt hem fel bespien, Gheen Poris hem en quell' armoedigh, Maer dat hy wijs end' stadigh leyt Zijn sinnen, om 't besorghde vroedigh Te bruycken in der maticheyt. Als Riet Wijckt Niet.
Cookies on Poetry Cove