Lier-dicht van de Nederheyt.
WAer van komt, o dwasen Mensch,
Al u ydel hert ghewensch?
Spruyt dat niet uyt u begheert?
Ay houdt op: u slecht gheneert,
Weet dat ghy zijt stof en slijck,
Hebt in al vernoeghen rijck.
Waer van komt, o windeblom,
Al u ydel hertgherom?
Rijst dat niet uyt hooghen // moedt,
Die doch gantsch verdrooghen // moet?
Danckt in plaets, met 't hert verkleent,
Die het al in al verleent.
Waer leest ghy in eenigh Boeck,
Dat u toe komt mondtghevloeck?
'T welck ontstaet uyt tooren quaet,
Voort ghebraght van Titans zaet:
Ay Aerdworm, u dat ontweyndt,
Eert dien, die den zeghen seyndt.
Wat baet u t' eenigher tijt,
Dat ghy draeght in 't herte nijt?
Vleesch en bloedt ghy soo verslijt,
En self niet te beter zijt,
Sulcke zielsieckt u vermijdt,
In liefd' u, o Mensch, verblijdt.
Oordeelt Recht. Schepens.