WOlfaert, welvaert Op de wijse: Den tijt is hier, dat men sal vrolijck wesen. WOlfaert, welvaert wensch ic, u reys moet lucken Tot Moluca waert, En weder t' huys ons by: Iason vermaert Bestont geen stoute stucken, Uyt kloecken aert, Met Argo, ghelijck ghy: 'T gulden Vlies hy Gekreegh, doch hopen wy, Tot 's lants Penaten // eer, sal ons u vaert al baten // meer, Wort toe ghelaten // keer Te doen behouden dy. Och Ocean, Vader van alle dinghen, Zijn ghekomen van, Ja ghy Neptunus vroedt, Die alleen kan D' aerde te beven dwingen, Den ouden Man Nereum doet voorspoedt, En reyse goedt Gheven op dijnen vloedt, Vijf snelle Peerden // saen Die reys vliegend' anveerden // gaen, Daer op der eerden // staen Menschen ons teghen voet. Laet ander Son, Ghy soeckende Nereïden, Al rondtom Triton Spelen lustigh ghesint, Met Arion, Tot een vreugdigh geleyden, En Palemon Recht stueren voor den wint, Ghy yeder kindt AEoli, nu begint, In jonstigh blasen // wel, Veranderen u rasen // fel, Den vijf Pegasen // snel
Bewijst dat ghy bemint. Fraey onghewont Bellerophon wilt sparen, O Iove hem jont U hulpe breet en wijt: Laet gheenen hondt Van Scilla hem beswaren, Houdt oock ghesont Zijn volck in u bevrijt: Diana zijt Met Iuno sonder nijt, Phoebus u raeyen // wilt niet al te heet doen laeyen // milt Aura dijn waeyen // stilt Med' ter bequamer tijt. Admirael Frans, Verwacht op al u schepen, Als binnen schans Des Amstels sy ghebracht Bersten bycans, Vol waren al ghenepen, O ghy Hermans, Halfgodigh klaer geslacht, Ghy werdt bedacht, Ons sang-goddinne wacht, Om uwen name // siet, Te singen een bequame // liet, Op dat u fame // niet In Lethis en versmacht. Reyst dan, de handt Des donder-Gods bevolen, Met 't Peerdt, Gelderlant, Ooc Zeelant, daer toe Sticht, En Wachter, want Elc Wachter, om niet dolen, Hoeft met verstandt Te doen wel zijnen plicht, Door goe toesicht Men alles wel uytricht, Och of Godt dede // dat Ghy brocht voorspoedigh mede // schat, En 't Duyfken 't vrede // blat, De blinde tot een licht. 'T licht boven Goudt, Dat Battus wrocht 't dierbaerste, Weerdigh in 't woest woudt Der wilden schijnen sal, 'T schijnt hope stout Belooft, dat daer op 't klaerste Ghesteent ghebauwt Sal worden 't Herder stal: Soet Herp gheschal Lockt af van bergh in dal De wilde Dieren // gram, En maectse van manieren // tam, Met 't goedertieren // Lam Eenigh: want Een ist al. Een is noodigh. Wel luck u reys in spoet, vaert in den naem des Heeren, Ons Landen tot welvaert, Godt boven al ter Eeren, Looft hem, en bidt, op dat al u voornemen Raeckt, Fijn tot bequamen eyndt, op dat hy 't voor u Maeckt, Al u zorgh hem aensmeeckt, te willen daer op Achten,
Rekent hier geen verlies, ghy quaemt, en gaet ooc Naect, Tis troostig met Gods woort hart tegenspoet te Sachten. Een is noodigh.
Cookies on Poetry Cove