Naer de voys van Bloemendael. O Christen broeders al, Die zijt in t'leven, Wilt u groot ende smal, Tot deucht begheven,
En denckt doch op den tijt, Die naer sal komen, Op dat hy moecht bevrijt Zijn van t'verdomen: Met een seer milde hant, Doet den Armen bystant, So sal den Helschen brant Matt. 25.V niet doen schromen.
Psal. 40.Gods segen zal met spoet Sulck een genieten, Die den Armen wel doet Sonder verdrieten: Daerom als ghy haer siet, Met naeckte leden, V bystant haer dan biet, En wiltse cleden. Esai. 58.Wilt haer breken u broot, Als sy hier lijden noot: Luc. 16.Want in Abrahams schoot Sult ghy dan treden.
Al is u macht seer cleyn, Wilt doch niet vresen, Marc. 12. Luc. 21.Denckt om dat Weewtgen reyn, Daermen van lesen: Doet als sy heeft gedaen, Uyt rechter minnen, Het sal u wel vergaen, Wilt dit versinnen: En van u tijtlijck schat, Matt. 7.Den Armen geeft doch wat, Want dit is t'rechte pat Ten Hemel binnen.
Gods ooghen open fijnPsal. 9. Psal. 10. Staen op den Armen, Dus wilt in druck en pijn Haer oock ontfarmen: En wilt haer in lijen, Toch niet beswijcken: Maer toont sonder mijen, Dat Troue moet blijcken, Soo sal t'Helsche gespuys V maken geen gedruys: Maer t'sal moeten confuys Van u wech wijcken.
Prince. Prince, weest niet verblent, Maer wilt aenmercken, Daer Liefd' is t'fondament,1. Cor. 13. Moet men so wercken. Nochtans door ydel waen, Daer niet op hopen, Maer op den rechten baen, Tot Christum lopen: Want zijn genaden soet Tot ons beraden vroet,Psal. 24. Psal. 153. Sonder versmaden, goet, Altijt staen open. Trou moet blijcken.
Cookies on Poetry Cove