Antwoordt.
U Vrientlick groeten tonswaert dat hier elck eendrachtich// hoort
Doet ons O trouwe Broeders, int hert verjubileren,
Daer van wy u danken die hier laet blijcken crachtich// voort
Dat by u plaetse heeft dit zuyver waerachtich// woort,
Liefde is t'fondament, en blijft zonder cesseren.
O Acoleyken wit t'welck Rethorica doet floreren
Die langh onder voet lach duer Zoyli practijcken,
Zy verheft nu haren standaert, men zietse domineren:
Door veel constige Constenaers begaeft vol Rethorijcken,
Die van veer commen besoucken des schoon Leytsche wijcken,
Ia heerlick verciert zijn en nu ter Stadt in treden,
Ghy ontfangtse minnelick zoo ghy voorwaer laet blijcken,
Dus willen wy ons oock als van Rethorices leden,
Simpelick vertoogen tot vereeren der Stadt vol vreden,
Van ons Orange Lely, aensiet zulckx in danck// fijn,
En weest daer by gedachtich Broeders uyt reynder zeden,
Dat wy In Liefden groyende noch in consten teer en kranck// zijn.