Berliner Liederhandschrift vom Jahre 1568

[126] Ein annder

Jn feůriß hitz, brentt mir mein hertz, Mein Syn vnnd mein gedanckenn, Nach deiner liebdenn, Mitt grossem schmertz, Jn rechter traůwenn ohn wenckenn, Jch scheiden vonn dir, Wantt es můs sein, Schlůß mich lieb jn deins hertzenn schryn, Das hertze mein verwertt sich so hartt, Noch frew ich mich der wiederfartt.

O aller liebste hertz mein, sall ich nů von dir scheiden, das brengett meinem hertzen schware pein, Das ich mich nitt en soll kleidenn, Mitt deiner liebdenn zů aller zeitt, Jch fůrchtt die Reiß sei mir fill zů weitt, Die dů mir gibst von hoher artt, Noch frew ich mich der wiederfartt.

Behaldtt dich woll mein hochste heill ich will dich altzeitt liebhabenn, Vmb keinem schatz, Bistů mir feill, Dů bist die mich thůtt Laůenn, Mitt deinem můndtlein vnůerfeirtt, alß dů mich schon lieb hast gelertt, Nů hor, fartt liebes Fräwlein zartt, Noch frewe ich mich der wiederfartt.