Berliner Liederhandschrift vom Jahre 1568

[67] Ein annder

Jtz wůrtt mir kundt verlangenn, Jn meines hertzen grůndt, Sůchtenn traůrenn langenn, Důck vnnd zů maniger stůndtt, moß ich im hertzenn dragenn, das ist ein leidenn groß, ich weiß es nemantz zů clagen, des stehenn ich freůdenn bloß.

Jch mocht es deme clagenn, Ja lieber wer jme mein leidt, Drůmb můß ichs alleine dragenn, Das ist gar schwar arbeitt Je doch so will ich hoffenn, wehr weiß wie es gefeldtt, es mocht noch werden offen, ich werdt zů ir geseltt.

Mich will verlangenn thottenn, vnnd es mich hartt erbrantt, ich liegenn jn grossenn nothenn, doch stett zů ir gewantt, mein hertz ohn widder kerenn, biß aůff mein hinnefartt, Jn freůden kan sie mich ernerenn, wan sie nitt wesenn woltt zů hartt.