Ie seray vous bon amy.
ICk vveet een seer schoon Godin
VVaerom ick lijd veel smert,
En sy houdt my met haer min,
Dus lijd ick pijn in ’t hert
Om dees vrou, daer ich trou,
Om dees vrou daer ick seer goet
Veel om lijden moet.
Maer als ick aensach die deucht
En edelheyt van haer,
Soo vverde ick seer verheucht,
En bracht in't openbaer,
Haer manier, en bestier,
Haer manier ende haer deucht
VVracht in mijn veel vreucht.
Och mocht ick met lusten vry
VVesen u Herder teer,
Dan soo soud ick hoeden bly
V schapen met veel eer,
In een vvey, en valey,
In een vvey die staet seer groen
Soud ick mijn gaen spoen.
Daer soud ickse voeden vvel
Na u believen reyn,
En ick soud mijn spoeden snel
Tot u vee in't gemeyn,
En ick sou, edel vrou,
En ick soude dan seer eel
V vee maken veel.
Daerom mijn Princes doch jont,
Te vvesen u dienaer,
Soo sal ick in corten stondt
Onse schapen te gaer
Hoeden bly, int vvoudt vry,
Hoeden bly voor ons Godin,
Tot onser ghevvin.
Liefd verwint sterckheyt.