Stemme: La Durette.
MYn hert laet vryheyt varen,
’T beschermen is te laet
VVant ten mach u doen gheen baet,
Het soud’ mijn pijn besvvaren,
En oock mijn straffe fel
Door die mijn doet dit ghequel.
Niemandt sonder sijn schade
Die Goden oyt aensach,
Alsoo doen ick mijn gheklach
Door ’tghesichte beladen
Van mijn liefs schoonheyt vvreet
Komt mijn nu alleen dit leet.
Yemandt door blixems slaghen
Somtijdts beschadicht vverdt,
Ende is verbaest in ’t hert
Als die niet kan verdraghen
Het groote Hemels licht,
Soo straelt op mijn haer gesicht.
Haer keeltjen claer om singhen
Veel soeter is ghestelt
Als des Nachtegaels op’t velt,
Om d’herten te doordringhen
Met lieffelijck accoort
Van een yder die het hoort.
Als ick u deuchden poghe
Te schrijven altemet,
Liefjen hier doch eens op let,
Soo vind’ ick mijn bedroghen,
En prijs u altijdt min
Als ghy vvaert zijt in mijn sin.
Ghy Prince van hier boven
My dees Princesse gheeft,
Die om haer te dienen leeft,
Op dat ick u mach loven
En dancken vroech en laet,
Tot spijt der benijders quaet.