Stem: Weet ghy maeghden arm en rijck. ARiadna schoone Maeght Waerom draeyt ghy u hooft, Van hem die ghy meest behaeght, 'K en had dat niet ghelooft: Op den dagh, dat ick sagh Dat ghy uyt medoghentheyt 'T gulden licht, u ghesicht Keerden met soo hooghen leyt Van een verweesen man, Ick heb ghepresen dan 'T heeft my veer verleyt. Die om snoode schelmery Veroordeelt was ter doodt,
Dies sijn sterven deerde dy, Beweeghlijck in sijn noodt: Maer eylaes, of ick raes, En in hooghe nooden swerf, Of ick sucht, of ick ducht, En thien duysent dooden sterf, 'T schijnt ghy en achtse niet, Want ghy belachtse siet, 'T loon dat ick verwerf. Over een ghevanghen, die Den doodt dick had verdient, Blinckt ghy schoone wanghen, die Ghy 't looft voor uwen vriendt: En ghy waert, oock beswaert Voor den onbekenden bloet, Maer ghy vlamt, en vergramt, Als ghy 't aenschijn wenden moet, Wanneer u trouwe slaef Sijn grootse vrouwe braef Minnelijcken groet. Hooghe schoone lichte Son Die my soo doodelijck haet, Ach! die eenmael sterven kon Daer ghy u vinden laet, Blijder wensch, had noyt mensch Die uyt groot ellende quam, Mijn verdriet, ginck te niet Als mijn leven eynde nam, Nu sterf ick alle daegh, Die voel mijn vallen staegh In een wreeder vlam.
Cookies on Poetry Cove