Wijse: Ne vous offences Madame.
IOfvrou ick en kan niet vvinnen
Op u stuyrsche vveesen straf,
'T zijn nochtans gheen kuysche sinnen
Die mijn vvenschen doen na't graf.
Ick en kan u niet bevveghen
Door mijn heusche liefd' oprecht,
'Tkomt nochtans niet uyt hooghdreghen,
Maer door u ghedachten slecht.
Recht beleefde vrouvven ooren
Menschlijck men bevveghen doet,
Maer men kan u niet bekooren,
VVant ghy zijt te grof van bloet.
Sonder teken van medoghen
Acht ghy liefde min dat niet,
Puft die pijle snel ghevloghen
Die ons liefd' in't herte schiet.
Al quam liefde selfs u smeken
Met sijn alder sachste reen,
Hy sou slechts sijn hooft staen breken,
VVant ghy zijt so hardt als steen.
Nochtans ist der vrouvven eere
Eens van liefd' te zijn gheraackt,
Liefd' kan hooghe saken leeren,
Liefd' maeckt vvijs en vvel bespraeckt.
Aen veel onghebonde reden,
Aen een onbesnoerde tongh,
Aen veel vvilde vvulpse seeden
Siet men vvie liefd' noyt en dvvongh.
Maer dat schoonste bloedt van allen,
'T beste, klaerste dun en puyr,
'T hoort door liefde neer te vallen
'T edel teken van natuyr.