Wijse: Ick min mijn Harder.
ACh soete Phillis,
Denckt niet dat 't gril is
Dat ick (Lieff) ontsteecken
Ben, voor uwe treecken,
En vriend'lijck ghelaet,
Phillis, Phillis, my doch niet versmaet.
2 V ooghskens stralen
Die doen nu dwalen
Myne jonghe sinnen,
Die door uwe Minne
Vast ghekluystert zijn,
Ach Phillis, Phillis, versoet eens mijn pijn.
3 Vooghdes mijns harte,
Voedtst'res mijns smarte,
Ghy die ziel en leven
Neemt, en weder gheven
Kunnet met een woort,
Ach Phillis, Phillis, die mijn ziel bekoort.
4 Hoe langh sal 't dueren,
Noch dat ick trueren
Sal, om u mijn schoone?
Wilt my doch beloonen
Met u weder-min:
Ach Phillis, Phillis, keert tot my u sin.
5 Siet hoe ter Aerde,
Ick legh, ach waerde
Voor u voeten neder,
Nymphe mint my weder,
Toont u slaef ghenae,
Ach Phillis, Phillis, gunt my 't woordtje Jae.
J. v. Mol. Liefd is God'lijck.