Stemme: Hoe leg ick hier in dees ellenden.
SChoon d'Hemel niet en wil ghedoghen
Dat ick versell' u mijn vriendin,
De Liefd nochtans heeft sulck vermogen
Dat ghy ghestaegh door-waert mijn sin,
En doet in 't diepste van mijn droomen
V vriendelijck wesen voor my koomen.
2 Altijdt speelt ghy in mijn ghedachten,
't Zy wat ick doe, of wat ick laet,
't Gheheughen my vernieuwt veel klachten,
Als ick denck aen ons soete praet,
Ons nacht-ghevry en lieve lusten,
En hoe vernoeght wy elck-aer kusten.
3 Al ben ick ver van u verscheyde,
Ghy zijt (Lief) noyt uyt mijn ghedacht,
De woeste zee tusschen ons beyde
En heeft in't minste deel gheen macht
Dat sy een enckel vonck mijn'r hetten
Wtblusschen kan, ofte versetten.
4 Eer sal de Spaensche zee verdrooghen,
Datmen drooghsvoets daer door sal gaen:
Eer ick naer and're Liefd sal pooghen,
Of naer eens anders gunste staen,
Eer ick u Liefde st[...]e vergelde
De Son nimmer bestraelt de Velde.
5 Ick hadde wel ghehoopt eer langhe
V wederom ghesont te sien,
Maer d'Hemel wil ons reys verlanghen,
En dwinght my verder af te vlien,
En drijftme nae der Soriers stranden,
En Cypris daer Venus eerst lande.
6 Wilt ondertusschen (Lieff) verwachten
Gheduldelijck mijn wederkeer,
En gheen quae klappers tonghen achten:
Want sy ons luck benijden, meer
Ick wensch dat ghy wel moghet varen,
En d'Hemel u ghesont wilt sparen.
Verandert in tijdts.